Poliki

Atalak: Kondarrak

Ez politki, ederki edo ondo, baizik eta mantxo, geldo, astiro, batxe. Lasai antzean, alegia. Azkarregi ez, alferrak inkomodatu gabe, nagiak sobera zirikatu barik. Intzineradora gelditu bai baina Gipuzkoako aginte faktikoak ohartu gabean… posible balitz.

Zubieta gainekaldean errauste planta eraikitzeko hango mendi eta basoei egindako urratuak berdin ikus daitezke Lasartetik eta Usurbildik. 2008an lasartear batek eta usurbildar batek antzeko kopuruarekin laguntzen zioten intzineradoraren asmoari, zaborrak berdintsu nahastuta abandonatuz kaleko edukiontzietan. Lau urte pasa ondoren, usurbildarrak 100 kilotik 20 baino gutxiago lagatzen ditu nahastuta, lasartearrak 70 baino gehiago.

Hernanik 2010ean orokortu zuen hondakinen gaikako bilketa. 2013ko abendurako, 3,5 urte horietan doi-doi iritsiko da nahasturik uztera Donostiako herritar batek 2013. urte bakarrean laga duena adina zabor nahastu. Prentsako titularrak sinesten badituzu, 3-1 irabazi duen ekipoa dabil gaizki, Diario Vascorentzako Hernani da arazoa eta ez Donostia.

Gipuzkoa osoa Usurbilekin batera hasi balitz atez ateko bilketan, Zarautzko Urtetako zabortegira askoz zarama gutxiago iritsiko zen, urtero gaurko kopuruaren laurdena, barruan askoz txerri-jan gutxiago edukiz orain bidaltzen dietenaren aldean ia kiratsik gabea.

Miraririk ezean, 2013a bukatzerako Donostiako Loiolako zein Amarako edo Antiguako herritar bakoitzak sortua izango du urte bakarrean Astigarragakoak ondoko hiru urtetan pilatuko duena baino errefus gehiago. Joka dezagun astiro, munstroa soberan haserrarazi gabe eta 2016a amaitzen denerako, sei urtetan Oiartzungo batek sortuko dituen 120 kiloen ondoan Hondarribiako edonork pilatuak izango ditu onenean ere 390tik gora.