Navajoen harmonia (2/3)

Atalak: Sailkatugabeak

[Bestelako Navajo (1/3) sarreraren jarraipena]

“Baina, funtsean, Nashibittik ez zion sekula irakatsi garraztasun hori. Yeibichaia irakatsi zionean Gauaren Bidearen azken gauean, izentzat ezarria zioten Galderak Dagitzan Hori. Baina Leaphorn, hirutan hogei urte beranduago, Erantzuten duen Hori izendatu zuten.  Nashibittik berak erakutsiak zizkion Leaphorni Bedeinkapenaren Bidearen hitz eta elezaharrak, berak azaldu zion Jainko Jendeak erakutsi ziola Lurrazaleko Jendeari nola bizi, berak irakatsi zizkion Aldatzen den Emakumearen ikasgaiak: gizakiaren helburu bakarra edertasuna dela, edertasuna ezin dela aurkitu harmonian baizik, eta naturaren harmonia hau harrigarriro konplexua dela.

– Zuhaixka mugitzen delarik, esana zion Hosteen Nashibittik, jakin ezak zerbaitek duela mugiarazi. Eta jakin ezak bera mugitzeak eragiten diola txolarrearen hegadari, beleak behartzen duela arranoa bere hegaldia aldatzera, arranoaren hego zurrunak menderatzen duela Haizeetako Jendearen  borondatea, eta jakin ezak horrek guztiak eragina baduela hire eta nire gain, zakur basatiak daraman arkakusoak eta lertxunaren hostoak duten bezala.

Hori zen beti haren lezioen norabidea. Naturaren baitako elkarren mendekotasuna. Kausa bakoitzak zekarren ondorio bat. Ekintza bakoitzak, bere erreakzioa. Denak zeukan zergatia. Edozein gauzatan bazen ordena bat, eta ordena honetan zetzan harmonia. Horrela ikasten zen gaizkiarekin bizitzen, hura ulertuaz, haren zergatia aurkituaz. Eta horrela zen posible ikastea pixkanaka eta metodoz, zorte pittin batekin, ‘edertasunari buruz joaten’, gauzen atzean beti dagoen ordena bilatu eta aurkitzen”.

[Izan ARGIAko bazkide: astekariaren harpidedun edo argia.eusen laguntzaile]