Saint Philberteko matxinada

Atalak: Kondarrak

Ezetz esan zuten 2002an. Herrian ez zutela onartuko 60 hektareatako zabortegirik egitea. 2.700 biztanle dauzka Frantziako Vendée departamenduan Saint-Philbert-de-Bouaine herriak, Ar-Naoned (Nantes) inguruan. Baina biztanle horien artean eduki behar du fundamentu handiko jenderik, zeren eta etxeko zaborrak modu autogestionatuan kudeatzeko eredu bihurtu baita.

Eskualde mailako zabortegiari uko egin eta bi urtera, 2002an, konpost eremua jarri zuten martxan Saint-Philberten. 2.500 metro karratuko terrenoa egokitu zuten herritarren sukaldeetako hondakinak konpostatzeko, eta horrekin batera ahalik eta jende gehienak parte hartzeko kanpainari ekin zioten. Bultzagileek herritar guztiekin hitz egin zuten: familia, ostatu, komertzio… Lau urte geroago, herritarren %80k hartzen zuen parte konpostaketan.

ARGIAk “Auzolanean zaborrik ez eta konpost hobea” artikuluan 2007ko abenduan eman zuen Saint Philbertekoaren berri. Honela esplikatu zuen espiritua Jean-Pierre Morisseau zinegotziak: “Politikariek soluzio tekniko eta automatizatuak baizik ez dituzte ikusten, bereizketa mekano-biologikoa eta beste. Baina hain zuzen alderantzizkoa egin behar da: gizakietan inbertitu, erabiltzailea bihurtu protagonista”.

Sain Philbert herria dago geroztik Frantzian hedatu den Compost Citoyen mugimenduaren muinean. Ba ote da herri egokiagorik Auzokonpostarien I. batzarra antolatu duen Usurbilekin senidetzeko?

[Izan ARGIAko bazkide: astekariaren harpidedun edo argia.eusen laguntzaile]