Agur bero bat kedarrez

Atalak: Kondarrak

2012ko abenduaren 2ko ilunabarrean ETBko Gaur Egun albistegiari erreparaka zeudenek lehenbizi ikusi zuten Espainian, gu barne, urritasunen bat duten milakak Madrilen egindako manifestaldia, ondoren EHBilduk Eusko Legebiltzarrean laister Laura Mintegi lehendakarigaitzat aurkeztuko zuela, segidan Andoni Ortuzarren ahotik EAJren erantzuna, beranduago PSOEk Felipe Gonzalezi egindako omenaldia, horren ostean Mahmud Abbasi Zisjordanian antolatu ongietorria NBEtatik bueltan, gerotxoago Egipton Morsi presidenteak dauzkan istiluak, eta Japoniako tunel batean gertatu istripu ikusgarria, eta Gasteizko Salburuan egindako zuhaitz landaketa, eta halako batean irribarrerik galdu gabe 06 minutu eta 20 segundu generamatzala Saioa Martijak iragarri zuen: “Zamudioko lantegi batek gurpil zaharrak hartu eta zementu lantokientzako erregai ez-kutsakor bihurtzen ditu“. Aktualitatea bor-bor.

Zamudion zerbitzu sozial eta ingurumenmaite hori egiten duen enpresan, omen, nabaritu dute krisiarekin jendeak ez dizkiola kotxeari lehen bezain maiz aldatzen gurpilak. Irudietan, pneumatiko mendiak. Hala ere 40-50 tona iristen zaizkie egunero. Horiek txikitu ondoren zementu fabriketan erabiltzeko energia alternatibo bihurtzen dira. Omen. Lantegia duela 15 urte inguru sortu zuten, Europak debekatu zuenean gurpilak zabortegietara eramatea.

Zamudioko lantokian Frantziatik ekarritako makina batek orduko zazpi tona gurpil txikitzen ditu. Azken belaunaldiko teknologia behar erruberak puska txikitan zatitzeko. Gurpilentzako errota, edo errotentzako eihera, frantsesa baita. Alvaro Torregrosa gerenteak esplikatu du zein ona den kautxua erretzea ingurumenarentzako: “Gurpil bat erretzean CO2 murrizketa bat ematen da, horregatik positiboa da”. Lastima obra sozial horretarako lantoki bakarra egotea EAEn, offeko ahotsak lehen hala argitu baitu. Offeko ahots berak esan duenez, kautxuz, ikatzez, oihalez eta altzairuz eginak omen dauden gurpilak birziklatzeko modu erreza da. Ea, ondo ulertu ote dugu gurpilen osaketa… goazen gaztelaniaz Estibaliz Ruiz de Azuak aurkeztutako Teleberri ikustera, han ere emango dute eta. Gaztelaniazkoan itxaron behar duzu 30. minutua arte, espainolez beti egiten ditugu gauzak luze eta elenganteago: “El neumático se fabrica a partir de caucho, textiles, alambres de acero y negro de humo“.

Ze ondo. Baina pena izan da kazetariak ozenki aipatu ez izana publi-erreportajeko Neuciclaje ONG hori oraintxe Industria eta Ingurumen sailburuorde denaren enpresa ere badela, Xabier Garmendia Martinezek sortua Bizkaiko gurpil enpresekin eta zementu fabrikekin -sailburuordea Cementos Lemonako gerentea ere izana da- elkarlanean. Pozarren egon behar dute justu erreportaje eder horren bezperan Arratiako Igorren “Hondakinen negozio itzela. Errausketa plantak eta zementerak” hitzaldia antolatu zutenek.

[Izan ARGIAko bazkide: astekariaren harpidedun edo argia.eusen laguntzaile]