Eliza pobrea

Atalak: Irratirakoak

[Euskadi Irratiko “Albiste faktoria”ko iritzi tartean argitaratua, 2009-12-07an]

Egun on, entzule.
Berrikitan kristoren esaldia irakurri diogu egunkari batean Jose Mari Esparza tafallarrari. Nafarroako Ondarearen Defentsarako Plataformako kide izateaz gain  editore eta idazle oparoa den Esparzak zera esan du: “Iruñeko elizbarrutia da Nafarroako etxe agentziarik handiena”. Eliza katolikoak protestarik publikatu ez duenez, pentsatu behar da gezurra ez dela. “Escándalo Monumental” izeneko liburuan argitaratu dute nolatan ari den Eliza Nafarroan sekulako ondasunen jabe egiten 1946an Francok Hipoteka Legea ebatzi zuenetik, baina are gehiago 1998an Aznarren denboran lege horri artikulu bat aldatu ziotenetik. Duela berrogei bat urte, 1967an, Zumarraga eta Azkoitia artean dagoen Aizpurutxoko apaiza zelarik Julen Lekuonak sortu zuen “Eliza pobrea / danontzat hobea” kanta hura, denboraldi batez bere fama izan zuena. Gaur ez da entzuten inondik. Guk dakigula, apaiz batzuek Eliza pobreago baten aldeko apostu pertsonala egin zuten arren, erakundeak ez du urratsik eman pobretzeko. Pentsatzen jarrita… mundu honetan  nork-noiz entregatu du boterea, dirua edo jabetza, ez bada bestek derrigorrean kenduta? Hemengo elizaren ondasun eta botereaz ari ginela, akordatu naiz Frantzian, Okzitaniako Arles hirian ikusitakoaz. Monumentu erromatarrez beteta dagoen Arlesek badauka katedral erromanikoa atari oso famatu bat duena. Hantxe geunden portiko ederrari begira ohartu ginenean bizkarrean geneukan beste elizan erakusketa bat zegoela: sarrerako txartelak esplikatzen zuen eliza zein mendetakoa zen eta… Estatuak desjabetua zela. Frantsesez desafectée esaten diotena. Arlestik atera gabe beste eliza erromaniko batean, noizbait fraide kaputxinoena izandakoan, beste esposizio bat zegoen. Eta hirugarren eliza desafectée“edo desjabetu batean udalak Arleserako antolatzen duen plan estrategikoa aurkezten zuten. Horra “Eliza pobrea”, edo gutxienez pobreagoa, herritarrek bortxaz desjabetuta. Nork daki, agian han apezpikuak ez dira hain zitalak izango abortoarekin, eta, agian ere, Vatikanotik kasu gehiago egingo diete bertako eliztarrei gotzai berria izendatzerakoan
Pasa egun ona, entzule.