Zirt-zart, gogoz egin ‘zan par

Atalak: Iritzia

Esan zidatenetik Norman Coussin-ek eritasun oso larria sendatu zuela barreterapiarekin, algara lasaiak nondik aterako nenbilen. Azkenean ikasi dut Coussinsek Marx anaien filmeekin lortu zuena nik Vocentoko periodikoa letuz alkantzatu behar dudala. Azaroaren 4koarekin lehertu behar nuela: “Gipuzkoa espera volver en tres años a las cifras de recaudación de la etapa precrisis”. Earra!  Barreterapiaren sekretua notiziak errejistro egokian irakurtzen datza, antza. Albistegietako neska guapa baten ahotsa jarrita haserretzea besterik ez duzu lortuko, burura ideia ilunak erakartzea: zer uste dute hauek, zozoak garela?, ez ote gara bada konturatzen Espainia kolapsotik metro erdira dagoela? Baina aldatu dut errejistroa, hasi naiz Eugenio txistegile zenarenarekin eta Francoren hura atera zait: “Egia da amildegira erortzeko zorian geundela, eta orain urrats handia egin dugu aurrera”. Txomin del Regatoren doinua imitatuz gero, “El Pais”eko gaurkoak ere balio dit: “Vizcaya se queda con un ‘agujero’ de 65 millones en los túneles de Artxanda”. Ez esan ez dela mundiala, obra publiko baten zulotik 65 kilo diru berri 10.800 milioi diru zahar desagertuarazi eta zorra bizkaitar guztiei osorik irentsiarazteko “hase falta sabidurensia, mucha sabidurensia”. Benga, orain Vaya Semanitako edozeinen estiloan saiatuko naiz Vocentoko supiztaileen beste hau letzen: “La científica amiga de los chimpancés clausuró las jornadas de Naturaldia de Chillida-Leku. Vamos muy rápido a un punto de no retorno en la Tierra”… eta Jane Goodall enteratu ere ez Cementos Rezolatik bostehun metrotara ari zela. Ito behar nuela. Egin barre, lagun. Barreterapiaren himnoa ere proposatuko dut, gu gazte ginenean Joxe Mari eta Mikel usurbildarrek modan jarri zuten beste hura: “Zirt-zart / gogoz egin ‘tzan par / pardel-ezkontza baño / obe den neskazar”. Baietz, eta gaztelaniaz are hobeto funtzionatzen duela: “Zirt-zart / y ríete con ganas”. Kantatzean akordatu Vocentoz eta Guardia Civilaz eta lehertu araziko zaituzte.