Fukushima, astelehena 28

Atalak: Sailkatugabeak

12:30 Hamabost egunen ondoren, Fukushimako zentralak kontrolik gabe dirau eta egunetik egunera larriagoa dirudi. Hori da egoeraren funtsa. Hona albistearen azken egunotako zenbait osagai:

– Zentralean bertan eta inguruetan erradioaktibitate oso handia detektatzen da. Hain handia ezen eta bertan lanean ari direnak behin eta berriro aterarazten baitituzte: herenegun une batean normala dena halako 100.000koa izan zen (hasieran bider 10 milioikoa zela esan zuen enpresak eta gero gezurtatu… baina komunikabide gutxik eman dute azkenean frogatu den zifra eskandalagarria: bider 100.000!).

– 2. erreaktoreak sorrarazi ditu kezka berriak (uranioz eta plutonioz elikatutako 3.arena jakina zen). Turbinen azpikaldean 1.000 milisiervet/orduko neurtu dute (gogoratu urtean 100 milisiervet arte baino gehiago pilatzea arriskugarritzat jotzen dela). Aditu askok ulertu du, eta Tepco enpresak berak aitortu probablea dela, erraktore barruko gaiak urtu eta ontzia zartatuta daudela.

– Zentralera argindarra “ia-ia” iritsia zela aurreratu eta hamar egunera, ez da egia oraindik: egunotan  Tepcok zabaldu duen argazki bat interpretatuz Union of Concerned Scientists (Zientzialari Konprometituen Elkartasuna) elkarteak erakutsi du 2. erreaktorearen kontrol gelako tresneria osoa ilunpean dagoela (nahiz eta argazkiak sala argitsu baten itxura ematen duen, pantaila eta indikatzaile guztiak eta are ordulari elektronikoa bera, denak amatuta daude).

– Tepco enpresak lehenbiziko aldiz Frantziako Areva eta EDFri laguntza eskatu die.

– Fukushimako zentralaren hondamendian eta haren kudeaketan erantzunkizunak dituzten bezala Japoniako gobernuak eta Tepco enpresak, gero eta handiagoak dira kexuak Energia Atomikoaren Munduko Erakundeak ez dituelako ezagutarazten zentral hark jaurtitako isuri erradioaktiboez dauzkan informazioak (Union of Concerned Scientistsek zabaldutako agiria).

– Gero eta gehiago diren arren Fukushimakoa eta Txernobylgoa parekatzen dituzten adituak, segitzen dugu datu gutxiegi edukitzen Japoniakoak orain arte uretara eta airera bidalitako gai erradiaktiboez. Zehazki,  CRIIRAD erakunde frantsesak ohartarazi du Iodo erradiaktiboaz ematen diren kopuruak ez direla benetakoak, gas moduan barreiatutako Iodoaren (partikuletan zabaldutakoa baino askoz ugariagoa izanik) daturik eman ez delako oraindik.