Toussaint prest dago Nafarroako eta EAEko zorraren auditorian laguntzeko

Atalak: Ekonomia, Zorra

Eric Toussaint Nafarroako EHBildurekin bilduta apirilaren 15ean. (Argazkia: Naiz, Twitter bidez)

Greziaren zor publikoaren auditoria egiten ari den batzordearen buruak, Eric Toussaint belgikarrak, garbi adierazi du Iruñean: “Etorkizunean Nafarroaren zorraren auditoria egitea onartzen badu aldaketarako gobernu batek, herritarren parte hartzearekin, horretan laguntzeko gonbitea onartzen dut”. EHBilduko buruzagiekin egindako bileraren ostean adierazi du publikoki.

EHBilduko Adolfo Araizek deklaratu du zorraren analisiak, bere jatorria eta kausak bilatzez gain eta bere lejitimotasun ezetik harago, aztertu behar duela erabilgarritasun sozialaren aldetik ere, badirelako proiektuak, hala nola Reyno de Navarra Arena, erabilgarritasunik ez dutenak. Bestalde,  Araizek aurreratu du Nafarroako gobernua aldatzearen aldeko beste indar politikoak bat datozela zor bidegabeari auditoria egitearen beharrean.

Iruñera joan aurretik, Toussaint Eusko Legebiltzarrean izana zen, Ogasun eta Aurrekontuen batzordean hitz egiten. Bertan parlamentariei eskatu die Eusko Autonomia Elkartearen zorra auditatu dezatela, demokraziak eskatzen duen gardentasun beharra asetzeko.

Atzoko kronikan esan genuenez, “Hemen da Eric Toussaint, greziarren eta euskaldunon zorra auditatzea sustatzen“. Hauteskunde kanpainaren erdian gaia kokatzea lortu du bi egunez. Bozketa iragan ostean ere entzungo dugu auditoriaren berri. Batetik, Greziatik iristen jarraituko duten albisteengatik: zenbait indarrek Europa desestabilizatzeko ahalmena ukatzen badiote ere, prentsaren ekonomiako orriei begiratu besterik ez dago ohartzeko Greziako krisiaren bilakaeran europar guztiok zenbat jokatzen dugun. Baina, bestetik, Euskal Herrian indar berezia hartu dezake zor publikoaren eztabaidak. Nafarroan, azken urteotako erabaki askoren informazio ezkutuak argitara aterako ahala Foru Komunitatearen finantzen benetako egoera ondo ezagutzea premiazkoa delako. EAEn, gero eta herritar gehiagok eskatzen dituztelako azpiegitura handien inguruan (errepide, portu, tren laster, hondakin…) egindako inbertsio eta apustuen xehetasunak.

Beroaldi ekonomikoak zirauen bitartean, zorpetzeaz diskutitzea gutizia akademikoa zirudien. XXI. mendeko krisi handiaren erdian, zorrarekin zer gertatu eta gertatzen den jakitea lehentasunezkoa da.