Esperantzara kondenatuak

Atalak: Azpiegiturak, Ekonomia

Pasaiako moila

General Motorsen krisiak ezinegona sortu du Pasaiako portuan autoen garraioaz arduratzen den UECC enpresan. Zaragozan dagoen Figueruelaseko planta da Pasaiako portuko bezero nagusia, urtean planta horretan egiten diren Opel markako 54.000 auto baino gehiago mugitzen dira Pasaian, auto guztien %68. “Figueruelasen pasatzen den guztiak eragiten digu” zioen atzo Rafael García Lekue zuzendariak El Diario Vascon. Badirudi oraingoz arnasa hartzeko moduan direla, Kanadako Magna enpresa orain arte GMrena zen Opel erreskatatzeko prest baita. Ikusteko dago lanpostu murrizketak nola eragiten dion Zaragozako lantegiari eta, bide batez, Pasaiako portuari.

Dena den, UECCkoek azaldu dutenez nahiz eta joan den urtean adina kotxe mugitu (304.000 unitate), azkeneko hiruhilekoa oso txarra izan zen. Hala ere, espero dute aurtengo urtea 220.000 unitate mugituz amaitzea “oso kontentu egongo ginateke, %25-30eko murrizpena izango bailitzateke soilik”, dio García Lekuek ulertu ezin den poztasunez. Hortik atera norainokoa den enpresaren eta sektorearen egoera.

Eta bitartean, Pasaiako kanpo portuarekin bueltaka ari dira agintari politikoak. Jakintzat ematen dute portua beharrezkoa dela eskualdearen eta Gipuzkoaren ekonomiarako. Nola egin dituzte kalkuluak ordea? 140.000 metro koadroko plataforma bat egiteak segurtatzen al du, berez, haren bideragarritasuna? 2008an Pasaiako trafikoa %5,9 murriztu zen, eta hala ere, kanpo portu berriarekin nahi dute orain mugitzen den tona kopurua hirukoiztu, esperantza hori dute, baina Opelekin gertatzen ari dena ikusita, zalantzak sortzen zaizkio bati.