Zero Zabor

Atalak: Azpiegiturak, Ekonomia, Gizartea

Hernanin Zero Zabor sortu dute Hernaniko herritar batzuek, “hondakinen kudeaketa burutsuaren aldeko” sare soziala. Helburua dute zaborra gutxitzeko sistemen inguruan informazioa bildu eta zabaltzea eta horretarako sare sozialaren gune birtuala ere sortu dute Interneten; gune irekia da eta edonork hartu dezake parte bertan. Zero Zabor kontzeptua mundu osoan zabaldurik dago –Australiako Camberrak jadanik 1995ean jarri zuen helburutzat 2010erako hondakinik ez sortzea– eta adierazi nahi du ezin ditugula hondakinak kudeatu ingurugiroan eragiten dituzten kostuak kontuan hartu gabe. Azken batean hondakinak gutxitu, berrerabili eta birziklatzea lortu nahi du.

Usurbilen ezarri berri duten atez ateko hondakinen bilketak ere etxeetan ahalik eta zabor gutxien sortzeko akuilu izan nahi du, eta besterik ezean, sortutako guztia birziklatzea. Oraingoz bide onean doaz, apirilean usurbildarrek iaz hilabete berean baino %85 hondakin gutxiago eraman zuten zabortegira.

Ematen du Usurbilgo atez ateko esperientziaren emaitza onak ikusita beste hainbat udal ari direla lanean sistema hori martxan jartzeko. Hernaniko Udala, Topagune Berdea izeneko ekimen parte hartzailearen barruan hausnarketa egiten ari da azkeneko hilabeteetan. Udal horretako arduradunek garbi esan dute beraien asmoa atez ateko sistemari heltzea dela.

Hain zuzen, duela gutxi Jordi Colomer izan zen Hernanin. Kataluniako porta a porta mugimenduaren teknikaria da bera eta Usurbilen atez ateko zabor bilketa ezartzen lagundu du. Colomerrek sistema horren oinarrizko azalpenak eman zituen baita haren inguruan sortu diren zalantzak argitu ere: “Praktikan funtzionatzen duen sistema bat da atez atekoa” esan zuen katalanak. Hitzaldiaren hainbat pasarte Zero Zaborren sare sozialaren gunean ikus daitezke bideoan.