Hipermerkatu ongileak
Carrefourreko poltsa
Plastikozko poltsen inguruan ETB2k atzo gauean eman zuen notizia deigarria izan zen. Komertzio txikian erosketak egiterakoan zenbat poltsa erabiltzen ditugun frogatzeko kale ikerketa moduko bat egin zuen kazetariak. Okindegian plastikozko poltsan sartzen diote eskatutako ogi barra, Ordiziako ferian ere berdin sartzen diote plastikotan nola patata kiloa hala ardi gazta, baita harategian Goierriko mondeju ederra ere. Ordu erdian poltsa mordoa pilatu zaiola kexa da, kontsumitzaile pasiboarena egiten ari dela argitu gabe. Aldiz, hipermerkatu ongileetan “kontzientziatuago” omen eta neurriak hartzen ari direla poltsak kentzeko… Eta orduan Anjel Lertxundik Berriako bere txokoan igandean idatzitakoa etortzen zaio bati burura – “Zer gera bat ba tontoak!” zioen Anduk supermerkatuan erositako produktu ultraplastifikatuei so–. Eta errematatzeko kazetariak zapata denda bat publizitatzen du plastikozko poltsetatik paperezko poltsetara pasa direlako. Jakina, ekologikoagoa da hori.
Bai, bai… neuri ere egundoko tonto aurpegia geratzen zait horrelakoak entzunda, merkatalgune handi horietako onberatasunaz aipamenak entzutean. Hori jakinda, irudi garbiketa, itxurakeria… “kontua ugari!” esango luke gure amonak.
Esandakoez gain, komeni da gure aurrekoei entzun eta ohartzea, erosketak plastikozko poltsetan etxera garraiatzeko ohitura hiper horiek zabaldu zutela hemen. Bai, orain hain onbera ageri zaizkigun berberek.
Gaia aldatuz, plastikozko poltsen kontu hau dela eta, beste burutazio honekin ezin diot irribarreari eutsi gai hau zabaldu denetik: nola demontre moldatu behar dute orain etxeko zaborrak ateratzeko poltsak kutxako kobratzailearen muturren aurrean harrapazka hartzen zituzten herritar horiek? Gustura ikusiko nuke baten baten aurpegia.
En fin… tontoak garela, ikaragarriak gainera!