Inertzia alderdikoietatik haragoko Kutxa

Atalak: Ekonomia, Gizartea

Kutxaren zuzendaritzak erabaki du batzar orokorrean ez eztabaidatzea Gipuzkoako Aldundiaren proposamena, Kutxa banku arrunt bilakatzea lekarkeena. Eskaria EH Bilduren ildoko Kutxako kontseilari orokorrek egin zioten Xabier Iturberi, Administrazio Kontseiluak proposamena gai-zerrendatik kanpo utzi ondoren.

Astekari honi eskainitako elkarrizketan, Iturbek azaldu zuen begiratzen ari zirela “nola konpondu” eskaeraren tramitea. Bada erantzuna jadanik eman du Kutxako lehendakariak, atzo Joseba Permach kontseilariak txio bidez zabaldu zuen berria:

(1/2)Gaur Kutxaren gutuna jaso dut #kutxabankpublikoa bermatzeko eginiko proposamena tratatzea eskatu ta ukatu digute pic.twitter.com/WAp1Hpakv2

— joseba permach (@jpermach) October 22, 2014

Hala ere Iturbek ARGIAri esan dionez Aldundiaren proposamena “batzarrean eztabaidatu daiteke eta seguru gai hau aterako dela”. Aurreikus liteke batzarraren amaieran “bestelakoak” atalean hitz egin ahal izango dutela proposamenaz, nahiz eta EH Bilduko ordezkariek esan duten ez direla horrekin konformatuko.

Alde batera utzita Kutxa banku arrunt bilakatzeak ere ondorio eta muga itzelak izango lituzkeela, larria da erakunde horren organo gorenak alternatiba gai-ordenan ez sartzea, noiz eta bere buruaz beste egingo duen batzarrean.

Dena den, halako foroetan eztabaida baino, nork bere diskurtsoa egiten du. Eztabaida aurretik dago landu beharra, izan proposamen ofiziala bideratzeko edo izan alternatiba bat mamitzeko. Eta bi kasuetan ez da halakorik egin. Parte-hartzea izan da prozesu honetan galtzaile handiena.

EH Bilduk Kutxan dagozkion patronoen sei eserlekuak hutsik utzi ditu. Aldundiaren eta Donostiako Udalaren 2 ordezkarien kasuan hutsik gera daitezke, baina inork ez du bermatzen gainerakoak halaxe geratuko diren, estatutu berrien zirriborroak (pdf) 18. artikuluan baitio kasu horretan patronatuak ahalmena izango duela zuzenean berak egoki ikusten dituenekin betetzeko eserlekuak.

Herri honetan badaude eragileak nahikoa jantziak eta inplikatuak ikusmolde aurrerakoia edukiko duen Kutxa bat defendatzeko. Ekonomia sozialean, unibertsitatean, kaltetuen plataformetan… Horietan guztietan, alderdiekiko irizpide independentea duten pertsonak daude. Ez al litzateke ona izango horiek ahotsa edukitzea banku fundazioaren patronatuan?

Begi bistakoa da Kutxan gaur egun agintzen dutenek gehiengoa izango duten patronatua diseinatu dutela, hareago, hemendik aurrera hala izango dela ziurtatu dute. Kontrol soziala delakoa kate motzean lotuta egongo da, orain arte egon den bezala. Baina azkeneko 30 urtetako inertzia alderdikoia gainditzen hasi beharra dago, benetako alternatiba bat eskaini nahi bada.