Lanpostuek %36 egin dute gora ekonomia sozial eraldatzailean

Atalak: Ekonomia

REAS sareak Araba, Bizkaia eta Gipuzkoako 70 erakunde aztertu ditu. 1.938 egun osoko lanpostu eta 100 milioi euroko diru-sarrerak dituzte orotara.

Aurreko urtean baino 10 erakunde gehiago ikuskatu ditu REAS-Euskadi ekonomia alternatibo eta solidarioaren sareak eta egun osoko lanpostuak 1.421 izatetik 1.938 izatera igaro dira (+%36). Enpresa eta erakunde horiek 100 milioi euroko diru-sarrerak eta 98,2 milioi euroko gastuak dituzte.

2013ko datuak biltzen ditu oraintxe publiko egin duen auditoriaren txostenak (pdf). Bertan, ekonomia solidarioarekin –“eraldatzailea” ere deitua– zerikusia duten adierazleak neurtu dituzte. Hala, ardura postuetan gehiago dira emakumeak (%51,6) gizonezkoak baino. Gobernu organoetan berriz, emakumeak %39 dira –IBEX 35eko enpresetan apenas gainditzen dute %10–. Soldaten arteko diferentzia ere enpresa konbentzionaletan baino askoz txikiagoa da, soldata altuena duenak baxuena duenak baino %80 gehiago kobratzen du, hau da, proportzioa ez da 2tik 1era iristen.

Ekonomia pertsonen eta komunitatearen zerbitzura dagoen tresnatzat duten eragileek hainbat topaketa eta kongresu egin dituzte udazkenean. Hala, Olatukoop-ek I. Saretze Eguna antolatu zuen urriaren 30ean. Azaroaren amaieran berriz, Ekonomia Sozial eta Solidarioaren Nazioarteko I. Biltzarra egin zuten Zaragozan.

Hala ere, enpresa eraldatzaileek toki gutxi daukate oraindik ekonomian orotara. REAS-Euskadiren txostenaren arabera EAEko enpleguaren %0,23 baino ez dute biltzen eta familia zabalagoa duten ekonomia sozialeko enpleguaren %3,04 baino ez. Gizarte Ekonomiako Euskal Behatokiaren arabera, EAEn 63.000 lagun inguru ari dira kooperatiba eta lan elkarteetan.