Mikel Cabieces: BBK-ko patronatuko aulkitik, fiskaltzaren aurrean esertzera

Atalak: Ekonomia

Mikel Cabieces eta Idoia Mendia Langraizko kartzelara egindako bisitaldi batean.

Kutxabankeko ordainketa bidegabeen auzian sekuentzia kronologikoa gero eta bitxiagoa izaten ari da. Azken “kointzidentzia” Euskal Herriko Agintaritzaren Aldizkariak (pdf) ekarri digu.

Fiskaltzak Mario Fernandezen kontra Kutxabankek jarritako salaketa ikertuko zuela esan zuen egun berean, astelehenean, argitaratu du aldizkari ofizialak Mikel Cabiecesen uko egitea BBK-ko patronatu-kide gisa. Erabakia abenduaren 23an onartu zen, baina ez da herenegun arte ofizial egin.

Testuan ez da uko egitearen arrazoia azaltzen, baina buruzagi sozialistak berak erabakia hartzerakoan azaldu zuen PSEko exekutiban sartu zelako egin ziola uko BBK-ko patronatuko kide izateari, banku fundazioen legearen arabera ezin baita patronatuan kargu politikorik egon.

EFE agentziak jaso zuenez, Cabiecesek bere azalpenetan esan zuen ez zuela PSEko exekutiban egindako lanagatik “soldatarik” kobratzen, baina “bateraezintasunak saihestearren” egin ziola uko patronatuko karguari.

Cabiecesen ordez Iñigo Calvo izendatu dute patronatuko kide, PSEk hala proposatuta. Calvo Deustuko Unibertsitateko ekonomista da.

Agintaritzako aldizkariak, bestalde, BBK banku fundazioren inskripzioaren oharra dakar. Bizkaiko aurrezki kutxako batzar orokorrak ekainaren 30ean onartu zuen banku fundazio bihurtzea, baina sei hilabete igaro dira martxan jarri arte.