Egia eta memoriaren transmisioan sakonduko dute Villabonan aste osoz

Atalak: Historia

Aritza Kultur Elkarteak ekitaldi sorta zabala antolatu du martxoaren 24tik 31ra. Tartean, Goyo Armañanzas mediku-psikiatraren tailerra, “isiltasuna apurtzeko espazio bat sortzeko”.

Egia jakiteko nazioarteko eguna da martxoaren 24a, Nazio Batuek hala izendatuta. Eta egun hori aukeratu dute Aritza Kultur Elkarteko kideek Memoriaren Asteari hasiera emateko. Esti Amenabarro pedagogoak Frankismoaren aztarnak arakatzen II: egiaren minak liburua aurkeztuko du, hain justu.

Aritzak urteak daramatza Villabonan gerra zibilean eta frankismoko lehen urteetan gertaturikoa ikertzen. Ikerketaren lehen fasean, dokumentuen bilduma bat argitaratu zuten, oraingo liburuan ordea, datuak eguneratu eta interpretatzeko aukera izan dute; ARGIAren 2428. zenbakian azaldu genuen bezala, “zergatik?” galderari erantzun nahi diote.

Hitzaldiak, dokumentala eta tailerra

Aste osoan zehar egiaren kontzeptuan eta memoriaren transmisioan sakontzeko ekitaldiak antolatu dituzte Aritzak eta Villabonako Udalak. Hala, Pako Etxeberria Aranzadiko auzitegi-medikuak hitz egingo du, baita Carlos Martin psikologian doktoreak. Martinek Mendebaldeko Saharan gertaturiko sarraskien inguruko ikerketa gidatu du berriki, Etxeberriarekin batera.

Evarista Sasiainbarrena Ondarretan, “abertzale amorratua” izateagatik preso egon zen villabonatarra (arg.: Aritza)

Josu Chueca eta Lourdes Errasti historialariek ere hitz egingo dute Villabonako jardunaldietan. Lehenak gerraosteko erbestea hartuko du gaitzat eta bigarrenak Frankismoa eta emakumeak. Negar Franko egingo zuen aitak dokumentala ikusteko aukera ere izango da. Bertha Gaztelumendi kazetariak zuzendua, villabonatarren gerraosteko bizipenak jasotzen ditu, adinekoek gazteei kontaturik.

Asteari amaiera emateko, ez ohiko coaching-a antolatu dute Aritzakoek. Goyo Armañanzas mediku-psikiatrak Isiltasuna: traumaren sintomak tailerra emango du bi egunez eta bertan isiltasunaren kudeaketaz artituko dira; zehazki “inposatu zaigun isiltasuna apurtzeko espazio bat lantzea” izango du helburu tailerrak.

Ikastaroan izena emateko azken eguna martxoaren 25a da eta Villabonako Udaleko webgunean egin daiteke. Bestetik egitarau osoa ikusteko aukera hemen daukazu, eta horrez gain www.amasavillabonaoroitzen.net webgunea ere martxan jarriko dute, orain arteko informazio guztia bertan biltzeko asmoz.