#ESEbruselan | Enpresa soziala versus utopia alternatiboa

Atalak: Ekonomia

Bruselako ekonomia sozial eraldatzailearen foroan bi ikuspegi oso diferente ikusi ditugu bat bestearen ondoan izan diren interbentzio banatan:

Jose Luis Monzón, Valentziako Unibertsitateko irakasle eta Espainiako CIRIEC-eko presidenteak ekonomia sozialaren inguruko definizioan haren pluraltasuna nabarmendu nahi izan du eta azkenaldian hainbeste entzuten ari garen “enpresa soziala” ere sartu du totum revolutun horretan.

Ricardo Petrella Louvaineko Univertsitate Katolikoko irakasleak zalantzan jarri ditu enpresa sozial horiek: “enpresa modu berriak daude, enpresa sozialak, baina halakoek orain arte ez dute ezer lortu (…) Insistitu behar da ondare publikoa (ura…) inportantea dela. Enpresari sozial baten ekonomia sozialak ez du hori egiten”.

Nolanahi ere, Petrella oso kritiko azaldu da orain arte ekonomia sozial eraldatzailean egindako lanarekin. Bere hitzek haserre jaurtitako aiztoek moduan egin dute hegan Parlamentuko sala honetan.

Gero eta okerrago dagoen mundua deskribatu du eta amaitu du esanez: “Ekonomia -i-le-gal batean gaude, kriminal da” eta segidan: “Gutako askok pentsaera alternatiboa izateko gaitasuna ere galdu dugu”. Bere ustez, bada garaia “Europarentzako gaitasun utopiko alternatiboa berreskuratzeko”, eta gaur Bruselan egiten ari diren foroan horixe eztabaidatu beharko litzateke.