Kataluniako burujabetzaren mapa

Atalak: Politika

Burujabetzaren mapa egin du Vilawebek

Zer esanahi du kolore laranjak mapan? Bai, asmatu duzu. Burujabetzaren aldeko alderdiak Kataluniako hauteskundeetan gehiengo izan diren udalerriak laranja kolorez daude margotuta. Vilaweb atariak mapa interaktibo ezin ederragoa zintzilikatu du burujabetzak Katalunian duen indarra grafikoki adierazteko, baita lortu ere.

Gurean antzeko zerbait egin izan du Gaindegiak Atlasa.net aplikazioan “Euskal Herria aintzat hartzen duten partiduen bozkak” irudikatzeko:

Gaindegiak hauteskunde emaitzekin prestaturiko mapa interaktiboa, Atlasa.net webgunean ikusgai.

Bistan da Euskal Herrikoa ez dela katalanena bezain monokromoa, baina noski, gure lagunek tranpa txiki bat ere egiten dute, Principat-eko emaitzak soilik baitaude agerian mapa horretan, gainerako herrialde katalanak grisez utzirik.

Mapa xeheagoa begiratuta, unionisten hiru gune nagusi ageri dira: 1) Bartzelonako “estrarradioa”, hegoaldetik eta iparraldetik setiatzen dute hiriburua herri langile-turistiko horiek (Gavá, Badalona, Casteldefells, Hospitalet…). 2) Tarragona eta inguruak (euskaldunen uda-hiri kuttun den Salou barne) 3) Val d’Aran-eko zati handi bat.

Aran bailara menditsuaren kasua aztertzeko hainbat osagai eduki behar dira kontuan: bertako errealitate soziolinguistikoa (herritarren zati handi batek aranera erabiltzen du egunerokoan, gaskoiaren aldaera bat); bilakaera historiko bereziak tokiko erakunde eta alderdi politikoengan duen eragina (hauteskundeen aurretik “beren erabakitzeko eskubidea” aldarrikatu zuen Val D’Arango kontseilu orokorrak); eta eski estazioek erakarrita sortu den goi mailako turismoa (Espainiako jet set jendearen bilgune, Borboi familiatik hasita). Baina tira, horrek analisi soziologiko sakonago baterako tartea behar du.