Atzoko eta gaurko bidelapurrak Txorokilen

Atalak: Ekonomia, Gizartea, Historia, Politika

Txorokileko Eguzkiola haitzuloaren sarrera

Arratia Bizirik plataformak antolatuta mendi martxa egingo dute datorren igandean (24) Zeanuriko Txorokil parajera. Bertan irekitzeko asmoa duten harrobiaren kontra protestatzeko izango da ibilaldia. Gorbeia eta Urkiolako parke naturalen artean ezkutaturik dagoen ingurunea da Txorokil, EAEko korridore ekologikoen sarean sartua, eta pagadi bikainak, haitzuloak eta desagertzeko bidean dagoen fauna gordetzen dira bertan; Saldropoko hezegune ederra ere harrobia eraiki nahi duten eremutik gertu dago eta hura ere kaltetua izan daiteke.

18 hektareatako harrobia irekitzeko hainbat neurri hartu dituzte jadanik instituzio publiko eta enpresek: arau subsidiarioak aldatu, lurjabeei erosketa eskaintzak egin… Bizkaiko Foru Aldundiak duela gutxi onartu zuen inguru horretarako Lurraldeko Plan Partziala, baina honek ez dio harrobiari mugarik jartzen. Esplotazioaren sustatzaile nagusia zeregin horretarako bereziki sortutako Canteras de Zeanuri S.L enpresa da, Urazca taldearen barruan dagoena. Ez da bizkorregia izan behar egitasmo horren atzean dauden interesak ikusteko. Urazcak AHTaren obren zati bat egingo du, Zornotzatik Lemoara doan 3,5km-ko zatia berari esleitu diote, adibidez. Hain zuzen, zati horretako desjabetzeak martxoan hasiko dituztela azaldu zuen atzo horretaz arduratzen den Adif sozietate publikoak. Beraz, Txorokileko ondasunak, basoen azpian dagoen harriak, errepide eta trenbide erraldoietan amai dezake hemendik gutxira.

Paseorako eta mendi buelta egiteko leku ederra da gaur egun ingurua. Duela bi mende baina, toki arriskutsua zen hura, bandolerorik ezagunenek bertan asalto ikusgarriak egin baitzituzten. Patakonek, Guiñik, Frantses Txikiak… inork baino hobeto ezagutzen zituzten Saldropoko bideak. Bidelapurrek aberatsei kendu eta pobreen artean banatzen zutela esan izan da, ideia erromantikoa dirudi, baina hein batean egia da. EAJko Azkunak errealitatetik kanpo bizitzea leporatu berri die AHTaren kontrakoei, “Asterix eta Obelixen herrixkan” bizi nahi izatea. Jakina, Azkunak nahiago du Europa modernoan bizi, gorbatadun bidelapurrek guztion ondasuna aberatsen artean banatzen duten horretan.

Informazio gehiago:

• Bizkaiko desjabetzen berri El Correon
• Harrobien eta makroproiektuen inguruko erreportajea ARGIAn
• Harrobien eta makroproiektuen inguruko bideoa ARGIAn