Birziklatzea derrigorrezkoa izatea nahi du EAEko herritarren %75ak

Atalak: Gizartea, Ingurumena

Ez da kalean sumatzen den pertzepzio bat, inkesta bateko datu objektiboak baizik. Eusko Jaurlaritzaren Prospekzio Soziologikoen Kabineteak Ingurumenaz egindako inkestan (pdf), besteak beste birziklapenaz galdetu diete EAEko herritarrei, eta hauek garbi adierazi dute: derrigorrezkoa izan beharko luke.

“Euskadi osoan zure ustez, hondakinak bereiztea derrigorrezkoa izan beharko litzateke eta egiten bada zigorrak jaso beharko lirateke?”. Horixe da inkestak zehazki galdetzen duena (42 eta 43 orrialdeak), eta hauxe erantzuna:

–          %27ak uste du derrigorrezkoa behar lukeela eta birziklatzen ez duenari isuna jarri beharko litzaiokeela.

–          %48ak uste du derrigorrezkoa behar lukeela, baina isunik gabea.

–          %23ak uste du ez litzatekeela derrigorrezkoa izan behar.

–          %3ak ez daki edo ez du erantzuten.

Alegia, herritarren %75a derrigorrezko birziklapenaren aldekoa dela EAEn. Probintzien aldetik apenas dago diferentziarik datuetan –Gipuzkoan ere ez– eta alderdien boto emaileen artean derrigorrezkoa izan beharraren jarrera gailentzen da, EAJko boto emaileen kasuan %75a eta PSEkoen artean %81a.

Badakigu inkesten fidagarritasuna askotan zein izan ohi den  –galdetutako herritarren %83ak dio dena edo ia dena birziklatzen duela–, baina joerak eta sentsibilitateak erakusteko ere balio izaten dutela esaten da.