Kokopelli korkoxa

Atalak: Izorrategikoak

Ipar Amerikako antzinako herrien artean -Pueblatarrak, Hopiak, Anasaziak…- ikono famatua da Kokopelli . Europarrak haruntza heldu baino lehen pintaturik zeukaten basamortuko labarretan. Batera edo bestera irudikatua, Kokopelli aurkituko duzu AEB eta Mexiko arteko herrietan turistei saltzen zaizkien oroigarrietan, izan katilu edo zintzilikario. Gizon konkordun bat dantzan eta sudur luzatuak osatzen duen txistua jotzen.
Hazien jainkoa omen zen Kokopelli, bizkarreko konkorraren barruan omen zeramatzan arto-ale preziatuak, jendeek beren milpetan babarrunekin eta kuiekin batera erein eta familien urte osoko otorduak bermatu behar zituztenak. Nazio batzuen legendetan, sorbaldan zekarzkienak giza-haziak ziren: neskatxei segika ibilitzen ei zen zakila tente xirulari lizuna… harik eta gure misiolariek lortu zuten arte mitoari buztana ezabatzea.

Hala ere, Izorrategi webgunean ez nuen horregatik ipini Kokopelli. Espondilitisean eta bestelako artritisetan munduko gizon jakintsuetakoa den John Merchant kaliforniatarrak kontatu du Kokopelli dela Espondilitis gaitza daraman gizakiaren lehenbiziko erretratua. Oinazetan izanik ere saiatzen da dantzan: konkorrak darakus bizkarrezurra harri bihurtuta daukala.

Egipton eta Mesopotamian gariak bezala Mexikoko Golkoan artoak (maiza esaten zaio gure herri batzuetan oraindik, uko eginez bezala inportaziokoari lehengo arto zaharraren izena oparitzea) baimendu zuen nekazaritzaren hasiera. Gizakiarentzako iraultza ekarri zuen Neolitikoak, abere eta landare basatien hezitzearekin. Baina artritisdunok gara aurrerapenari gizakiaren osasunak pagatu behar izan dion fakturaren lekukoak. Neolitikoak utzi dizkigun alboko kalte ugarietako baten pagatzaileak.

[Izorrategi gunea Espondilitis Ankilosatzailea izeneko artritisaz ari da. Baina artritisik ez duenak ere erruzko izorrategi dauka.]