Maiatz lilia erradak

Atalak: Sailkatugabeak

Kantatuz joango gaituk berriro ere hirekin zuekin kotxean. “Maiatz lilia erradak norat juan diren elurrak / Othoi, erradak non diren lehengo nexkatx ederrak / Ote lilia erradak non diren lagun onak / Norat juan zaizkidan amets arinak / Non othe diren lagunen arimak”. Mila bider oihukatu diagu zuekin batera “… Haizia hik erranzkidak mendien auhenminak / Eustakioren herresto peregrinak…”, Tomás Aragüesen agindupean orkestra ttikiak atzetik oihartzun egiten digula.  “Agur gudarien eguna”. “Garaztarra naizela”. Beti Atahualpa Yupanquiren “mi abuelo murió en la mina / sin cura ni confesión” hura oroitarazi digun  “Aitatxiri nion lehen galdegin”. Ahaztua diagu noiz ezagutu zintuztegun edo zerekin, “Tiki-taka” izango zen, edo “Iup-lala” edo batek jakin. Garai garratzetan, seguru. Kantak aurkezten edo hizketan, Etxamendi. Hi atzerago, makila beti eskuan. Ez huen ematen hik tonua? Bikoteko bigarrena baino askoz gehiago Larralde. Karreroren kanta kantatzen zuen kantaria baino askoz haboro ere bai. Diskretoa baina behar denean errez aurkitzen dena. Guk bazakiagu non, a capella: “Bihotza goibel nola negua duzu andere gaixoa / Pena saritzat zer othe nuke baizikan amodioa / Urraturen da hodei iluna gure zeruan dagona / Euskal Herria presondegiko giltzen haustera baitoa”.