Beste hauteskunde batzuk Amerikan

Atalak: Gizartea, Politika

FEVA elkartearen logoa

Jakina da euskal herritar guztiok hauteskundeak izan ditugula berriki, bueno, ia guztiok, zortzigarren probintzia deitzen diogun horretan oraindik ez baitira egin. AEBetan alderdi barruko primaria tematiak ospatzen ari diren bitartean, Argentinan prest daude beste hauteskunde batzuk egiteko. Herrialde horretako Euskal Etxeen federazioak, FEVAk, zuzendaritza berria izango du martxoaren 15eko bozketan irabazle ateratzen diren kideekin.

Inoiz baino saltsa eta eztabaida gehiago izango da gainera, betiko zerrendari beste talde alternatibo batek egingo baitio aurre, inoiz ez bezala. Lehenengoek “Guztientzako FEVA baten alde” leloa erabili dute eta Felipe Eiheragibel, erakunde horretako gaur egungo idazkaria, izango da zerrendaburu. Bigarrenek “Alternatibaren aldeko euskal etxeak” lemapean egin dute kanpaina, Córdobako Gure Txokoa euskal etxeko presidente Alejo Martin buru dutela. Eztabaida gogortu egin da hauteskunde eguna hurbildu ahala, zerrenda bakoitzak makina bat euskal etxeren babesa du bere atzean eta zatiketa nabarmena da Argentinako euskal komunitatean. Alternatiboek federazio “hurbilago” bat nahi dute eta bertako errekurtsoak –ekonomikoak ere bai– euskal etxeen artean hobekiago banatzeko asmoa azaldu dute, horretarako, erakundearen Estatutuak berrituko dituzte. Eiheragibelen zerrenda “kontinuistak” oposizioari erantzun dio dokumentu luze batekin, orain arte egindakoa defendatuz. Eztabaida euskal diasporan aspalditik dagoen barne tentsioaren isla besterik ez da, baina oraingoan ofizialki azaleratu da publikora.

Kontuan izan behar da FEVAk gaur egun Argentina osoko 95 euskal etxe eta 18.000 bazkide inguru ordezkatzen dituela. Bestalde, 2007an Eusko Jaurlaritzatik 65.000 euroko diru-laguntza orokorra jaso zuen eta horretaz gain diru kopuru zehatza dauka Euskal Herriko bankuetan gordeta instituzio publikoen laguntzak eteten badira. Ikusiko da larunbateko hauteskundeen biharamunak nolako ondorioak uzten dituen.