Transgenikorik Gabeko Erregioen Sarea Euskalduna jauregian elkartuko da

Atalak: Ekonomia, Gizartea

Biltzarraren logoa

GAOrik (Genetikoki Aldatutako Organismoak) Gabeko Europako Sarea Bilbon elkartuko da gaur hasi eta bihar arte iraungo duen VI. Biltzarrean. Sarea duela urte batzuk sortu zen, 2003an Europako Batzordeak nekazaritza konbentzionala eta transgenikoaren koexistentzia garatzeko egindako aholkuaren ondotik. Talde ekologista eta erakunde ugarik salatu dute bi nekazaritza ereduak bateraezinak direla, labore konbentzionalak transgenikoez kutsa baitaitezke eta erabat hondatu.

Egoera horri erantzuteko GAOrik gabeko Erregioak sortu ziren. Euskal Herrian udalerri ugari –azkena Mutriku–, Bizkaiko eta Arabako Aldundiak eta Eusko Jaurlaritza bera sare horren barruan daude. Dena den, sindikatu eta ekologistek instituzio publikoei eskatu diete teoria hutsetik praktikara igarotzeko; izan ere, erakunde hauek ez dute eskumenik gai horren inguruan, baina estatu-gobernuetan eragin dezakete nekazaritza biologiko eta konbentzionala transgenikoetatik babesteko.

Hain zuzen, azkeneko urtean aurrerapen batzuk egin dira norabide horretan. Alemanian esaterako, “transgenikorik gabeko” etiketa baimendu da eta Frantzian artoaren MON810 aldagarri transgenikoa ereitea debekatu da. Dena den, araudi komunitarioak ate ugari zabalik utzi ditu, eta Frantziako Asanblea Nazionalak onartutako transgenikoen lege proiektu berriak ez dio argirik eman auziari.

Euskalduna jauregiko kongresuan “transgenikorik gabeko” etiketak sustatzeaz hitz egingo dute batez ere, hala nola erregioen eskaerak politika komunitarioarekin uztartu beharraz. Horretarako, bi egunetako egitarau zabala antolatu dute, eta Portugal, Toskana, Bretainia, Euskal Herria edo Akitaniako adituek hartuko dute parte eztabaidetan.