Diasporen ikuspegi ezberdinak Biarritzeko Versant-en eskutik

Atalak: Antzerkia

Diaspora Bidaian

Biarritzeko Versant teatroak Diaspora bidaian antzezlana estreinatuko du gaur Bordelen (Pont Tournant-eko antzokia, 20:30ak). Joseba Sarrionaindia, Bernardo Atxaga eta Pier Paul Berzaitzen hainbat testu hartu dituzte kontuan obra egiteko, eta Venezuela, Haiti, Argentina, Quebec eta Euskal Herriko beste antzerki konpainiekin elkarlanean egina da. Arduradunek azaldu dutenez, euskal kulturak beste kulturetan izan duen eragina aztertu nahi izan dute eta bide batez nazioarteko antzerkilarien sarea sendotzea dute helburu.

Hala ere, mamira joanez gero, diasporaren hainbat aurpegi erakusten ditu antzezlanak. Bi anaia barkoxtar Ameriketara joaten dira 1820 urtean, batak dirua eta ospea lortzen du, bestea, poeta behartsu iparragirretar izatera kondenatua izango da. Bestalde Sarrionandiaren “Lagun izoztua” eleberria oinarri hartuta erbesteari buruzko ikuspegia ere garatzen du obrak. Denboran eta geografian saltoka dabil etengabe Diaspora bidaian antzezlanaren haria.

Antzelana gaur estreinatuko den arren, proiektua aurretikoagoa da. 2006an hasi ziren lana prestatzen eta Quebec-en edota Caracasen izan ziren Versant teatroko kideak tailerrak ematen. Orain, Bordeleko saioaren ondoren, Euskal Herrian barrena egingo du bira obrak, eta ondoren Quebec-en antzezteko asmoa dute.

Ikusi albistea hemen:

– Diaspora Bidaian ikusgarria bidean (EKE.org)
– Un viaje que une a Atxaga, Berzaitz y Sarrionandia (Infoartez)
– Euskal diasporari buruzko lana, Versant antzerki taldearen esku (Gara)