Atez ateko hondakin bilketa: aldekoak eta kontrakoak aurrez aurre

Atalak: Azpiegiturak, Gizartea, Osasuna

Andoni Amonarraiz (EAJ) eta Marian Beitialarrangoitia (ezker abertzalea)

Atez ateko bilketak eta erraustegiek bultzaturik, Euskal Herrian azkar ari da zabaltzen hondakinen inguruko eztabaida.  Maiatzaren 9an hasi ziren hondakinak atez ate biltzen Hernanin, %80ko birziklapena lortzeko helburuarekin. Usurbilen eta Oiartzunen ere biltzen dira hondakinak modu horretan. Marian Beitialarrangoitia Hernaniko alkatea eta Andoni Amonarraiz zinegotzia, aurrez aurre jarri ditugu, sistema horren inguruko begirada praktikoa eman dezaten. Elkarrizketa osoa aste honetako ARGIAn izango da irakurgai (2.249 zk.); hona hemen aurrerapen txiki bat.

Hondakinen sorrera eta birziklapena

Andoni Amonarraiz: “Lehenago ontzitan bildutako xerrak erosten zituen herritarrak, orain ere hala egiten du. Nik uste dut Hernanik hondakin kopuru bera sortzen jarraitzen duela”

Marian Beitialarrangoitia: “Atez atekoa Gipuzkoa osoan ezarriko balitz erraustegiak ez luke izango nondik jan, horregatik ari dira erraustegiaren alde daudenak bosgarren kontenedorearen alde egiten, onenean %35eko birziklapen tasa ematen duelako”.

Osasuna eta ingurumena

Marian Beitialarrangoitia: “Ni ez nago prest hernaniarren osasuna, negozio egitea bilatzen duen lobby intzineratzaile baten eskutan uzteko”

Andoni Amonarraiz: “Niretzako ez da batere osasungarria hondakinak hainbat egunez izozkailuan sartzea, edo langileek hondakinak eskuz jasotzea”

Bideragarritasun ekonomikoa

Andoni Amonarraiz: “Hobe da dirua errausketa tratamenduarekin gastatzea erreusa zabortegietan uztera itzultzea baino”

Marian Beitialarrangoitia: “Atez atekoa beste sistemaren tankerakoa da gastu aldetik, baina garestiagoa izango balitz ere babesten segituko nuke, uste baitut osasunak ez duela preziorik”

Eguneroko bizitza

Andoni Amonarraiz: “Gaur eta hemen bizi diren herritarrei bizitza errazteaz ari naiz, eta ez haiek kaltetzeaz etorkizuneko balizko osasun arazoen kontura”

Marian Beitialarrangoitia: “Ohitura aldaketa txiki bat da, baina hain da txikia, jendea segituan egokitu dela. Sortutako krispazioaren aurrean, herritarrak konturatu dira ez dela hain konplikatua”