Nafarroako sozialistak Sakanako atez atekoaz: “Hau etorkizuna da”

Atalak: Azpiegiturak, Gizartea, Ingurumena, Osasuna

Nafarroako Legebiltzarreko talde politikoak Sakanan izan ziren bertako hondakin bilketa sistema ezagutzen. Zenbait alderdiren ahotik entzuten ohituta ez gauden esaldiak bota zituzten. (Arg.: Nafarroako Legebiltzarra)

Laster hasiko dira Sakanan hondakinak atez ate biltzen. Altsasu eta Irurtzun oraingoz aparte geratu dira, baina gainerako herrietan %80 birziklatzeko karrerari ekingo diote; auzokonposta eta autokonpostarako jarri ditu Sakanako Mankomunitateak indar gehienak, bertako ekonomiarentzako pizgarri ere izateko helburuz. Duela bi egun Nafarroako Parlamentuko talde politikoak izan ziren eskualde horretako sistema ezagutzen. Gipuzkoan atez atekoaren kontra dauden politikarien ahotik entzuten ohitu gabe gauden esaldiak bota zituzten:  

– UPN: “Ez gaude, ez ados ezta kontra ere, bi edo hiru urte itxaron beharko ditugu ikusteko zein emaitza ematen dituen”.

– PSN: “Hau etorkizuna da, ez du zentzurik zaborra Nafarroa guztitik garraiatzen ibiltzeak”.

– Aralar-NaBai: “Ez da bidezkoa ezjakintasunetik inposizio bat dela esatea”

Hori bai, UPN eta PSNren iritziz sistema horrek baditu mugak, ustez nekazal ingurura soilik egokitu baitaiteke. Agian Lezon edo Hernanin bisita instituzionalak antolatzen hasi beharko dira aurki.