Atzeraldi kezkagarria

Atalak: Politika

Aspaldi ikusi gabeko irudiak gure herriko kaleetan. Bat-batean 90eko hamarkadara itzuri garela esango nuke: borrak, pilotakadak, bala zorroen hots metalikoa, karrerak, oihuak, odola… Atzokoa “atzeraldi kezkagarria” zela esan zuen EAJk. Bistan da baietz.

Herriraren kontrako sarekadarekin Espainiako Gobernuak duen intentzioaz luze hitz egin daiteke. Parot doktrinaz Estrasburgok emango duen epai osteko “ingeniaritza juridikoari” terrenoa prestatzeko izan liteke agian, edo ETAk egingo dituen urrats berriak blokatzeko. Baliteke preso politikoen kolektiboan hartuko ei dituzten erabaki inportanteak oztopatzea izatea helburu… Agian “mugimendu sakonago” baten aurrean gaude, gaur Garako editorialak dioen moduan. Dena dela, estrategia politiko bat dago atzean.

Baina mahai jokoan beste aktore bat ere badago, atzo behintzat garbi ikusi zen. Ezin jakin zehazki zer ulertu zuen Urkulluren gobernuak Jesus Eguigurenek egindako eskaeratik. PSE-EEko lehendakariak pasibotasunez ez jokatzeko eta “egoerak eskatzen duen mailan” egoteko exijitu zion Eusko Jaurlaritzari bere blogean.

Bada Ertzaintzak atzo Hernanin egindako oldarraldia ez zen nolanahikoa izan. Beharrezkoa al zen jendea jipoitzea? Gaixoak lurrera botatzea? Buruak irekitzea? Denok dakigu zer gertatuko litzatekeen ertzainek borrak kieto utzi balituzte. Ezer ere ez.

Amalur Mendizabal Amaiurreko senatariari zrtozi puntu eman behar izan dizkiote buruan ertzainen kolpeen ondorioz (argazkia: El Diario.es / Javi Julio)

Goizeko sarekada moduan, arratseko biolentzia ere erabaki politiko baten ondorio izan zen. Sikiera Espainiako Barne ministroak azalpenak eman zituen prentsaurrekoan. Esango al du ezer Segurtasun kontseilariak? Hala prentsa ofizialean “botilak jaurti” zirela zabalduta aski dela uste du?

PS: Josu Erkoreka Eusko Jaurlaritzako bozeramaileak adierazi du Segurtasun sailak “barne diligentziak” irekiko dituela Amalur Mendizabal senatariaren kasuan “zehazki zer gertatu den” aztertu eta behar izanez gero “erantzukizunak zehazteko”. Honako esaldi harrigarria ere aipatu du Erkorekak: “hau automatikoki gertatzen da Ertzaintzaren jokabideak odola isurtzen duten lesioak sortzen dituenean”.