Frankismoko torturatzaileak hedabide espainiarren jomugan

Atalak: Gizartea, Politika

Antonio Gonzalez Pacheco Billy el Niño non zegoen eta nola bizi zen azaldu zuen El Mundok argitaratzen duen Crónica astekariak, argazki eta guzti. Orain Interviú-k Jesús Muñecas guardia zibil ohiaren egungo berri dakar erreportaje zabal batean, Anparo Arangoaren torturen argazki eta guzti. Torturatzailea eta torturatua, biak aldamenean, ikaragarri gogorra da irudi hau:

Jesús Muñecasen egungo irudia argitaratu du “Interviú”k, ARGIAk bere garaian kaleratutako Anparo Arangoari egindako torturen argazkien ondoan.

“Egin dizkidazue argazkiak” esan omen die Muñecasek kazetariei eta autoan sartu aurretik zera gehitu du: “Hau guztia nire kontrako kanpaina bat da, dena gezurra da. Nik ez dut ezer egin, ez dut inor torturatu”. Erreportajeak sentsazio handia eragin du sare sozialetan eta baita telebista-kate espainiarretan ere. Hemen La Sexta-ko albistea:

Anparo Arangoaren 1976ko argazkiak izan ziren tortura agerian utzi zuten lehenak, eta duela hilabete batzuk azaldu genuen zeinek atera zituen eta nola argitaratu ziren Zeruko ARGIAn. Nork pentsatuko luke duela ia berrogei urteren ondoren oraindik argazki horiekin bueltaka ibiliko ginetik? Berriz ere dokumentu frogagarri gisa erabili behar izango zirenik torturatzailea seinalatzeko? Zigorgabetasuna, injustizia… zauri asko daude hemen itxi gabe.

Eli Nosellas, Juantxo Arangoa eta Jon Arrizabalagaren testigantzak bildu dituzte “Interviú”-n.

Ez duela ezer egin dio berak. Eli Nosellasi galdetu behar. 16 urterekin atxilotu zuten Tolosan guardia zibilek, Muñecas buru zutela: “Lurrean etzanarazi ninduten manta baten gainean eta gerrikoekin lotu ninduten; orduan bainera batean sartu ninduten. Geldi, itoko nintzela uste nuen, uste dut konortea galdu nuela. Muñecas azalpenak ematen ikusteko desiratzen nago, epaitu dezatela behingoz!”, halaxe adierazi dio Interviúko Ana Maria Pascual kazetariari.

Bainera, kolpeak, manta bustiak, umilazioak… ez ohiko hiztegia erabiltzen ari dira asteotan hainbat eta hainbat hedabide, Argentinako Servini epaileak frankismoaren kontra abiatutako auzia dela eta. Tamalez, Euskal Herrian ondo baino hobeto ezagutzen dugu hiztegi hori, terrore hark ez baitu etenik izan lau hamarkada hauetan.

Zenbat denbora igaroko da Unai Romanoren, Iratxe Sortzabalen eta beste makina bat lagunen torturatzaileak Interviúko portadan ikusi arte?