Gazte independentisten alegatua

Atalak: Politika

Segikoak izatea leporatuta Espainiako Auzitegi Nazionalean epaitzen ari diren 36 gazteren kontrako epaiketa bukatzear da. Gaur akusazioak hitz egingo du, bihar defentsak eta etzi amaierako alegatuak irakurriko dituzte.

Gazteen alegatua agerraldi publiko batean ezagutaraziko dute, eta pertsona ezagunen babesarekin, tartean Jesus Egiguren, Txema Montero, Toti Martinez de Lezea, Alex Txikon eta Miren Amuriza. Idatziaren berri jada izan dugu sare sozialetan, hainbat lagunen irakurraldiak ere jarri dituzte Youtuben, Mikel Labaka eta Mikel Aranburu futbol jokalarienak esaterako:

“Zubiak eraiki nahi ditugu lehen harresiak zeuden lekuan” dio idatziak hasieran. Euren esanetan “konfrontazioa eremu politiko hutsera mugatuko den etorkizunaren jabe” izan nahi duen “gu” berri bat sortu da Euskal Herrian.  Hala, haien kontrako epaiketa, konponbidea oztopatzeko “harresi” bat gehiago dela diote: “Garaiz eta lekuz kanpo dagoen anakronismoa da”.

Alegatuan, epaiketaren ondorio juridikoak ere mintzagai dituzte: “Gure aurkako epaiketan berez delitu ez diren ekimenak aurkeztu ditu akusazioak froga gisa, hala aitortu du, gainera”. Garai berriotan beharrezkoa den justizia trantsizionala defendatu dute. Izan ere, 6 urteko kartzela zigorra eskatzen du fiskalak auzipetuentzat –gehienen kasuan torturapean egindako deklarazioak oinarri hartuta–, prentsaurrekoak emateagatik edo txosnetan txandak egiteagatik.

Abokatuek badute lana nabarmentzen zigor eskaera desorbitatu horiek oinarrizko eskubideen kontrakoak direla, Espainiako Konstituzioan ere ez dela halakorik kabitzen. Agian, bide horretatik, epaiketaren martxan eragin eta azken epaia aldatzerik izango da, eta zigor baxuagoekin kartzela saihestu. Gazteek oso garbi diote alegatuan: “Prozesu judiziala bertan behera uztea eskatzen dugu, edo auzipetu denak absolbitzea, edo egokien den moduan, baina 40 gazte hauek libre nahi ditugu”.

Momentu honetan, Madrilen egiten ari diren epaiketaren berri ematen ari da hainbat erabiltzaile Twitter bidez, #40aklibre hashtag-a erabiliz:

“#40aklibre”(r)i buruzko Txioak

Atxikimendua eman duten herritarrekin egindako bideoak.

Amets Arzallus bertsolaria.

Oihana Lopez Bilgune Feministako kidea.

Alex Txikon kirolaria.

Miren eta Xabier Amuriza bertsolariak.

Toti Martinez de Lezea idazlea.

Bakartxo Ruiz, EH Bilduko hautetsia.

Igor Elorza eta Unai Iturriaga bertsolariak.

Francis, Doctor Deseo taldeko abeslaria.

Ainhoa Cabrera Bizkaiko Urtxintxa eskolako kidea.