Giza katearen mapa
Ekainaren 8an Gure Esku Dago ekimenean parte hartzeko herri bakoitzari egokitu zaion zonaldea azaltzen duen mapa da honakoa. 123 kilometro eta 27 udalerritan barrena egingo da giza katea (deskargatu pdf-a hemen).
Lehen begiratuan ikus daitezkeenez banaketa herriaren hurbiltasunaren arabera egin dute antolatzaileek. Hala, Bizkaia aldekoak batez ere Durango-Bergara artean kokatuko dira, Gipuzkoakoak Zumarraga-Beasain tartean, Arabakoak Beasain-Etxarri artean eta Nafarroakoak Irurtzun- Iruñean. Ipar Euskal Herriko herriak ez dituzte zerrendatu, baina haientzako 111. eta 112. kilometroak daude erreserbatuta. Katalanentzako ere badago kilometro oso bat, baita mendi martxetan parte hartu behar dutenentzat ere.
Dena den, hobeto erreparatuz gero nahasketa handiagoa suma daiteke, Euskal Herriko aniztasuna erakusteko asmoz diseinaturik balego moduan. Hala, Antzuolan bat egingo dute barakaldotarrek eta elgetarrek, Arakilen larrabetzuarrek eta hernaniarrek, eta Lazkaon elkar topo egin dezakete Bilboko Miribilla auzoko Athletic zaleak eta Orexako baserritarrak.
Irudi kurioso gehiago ere ikusi ahal izango dira ekainaren 8an. Esaterako, sekula ez da hainbeste bilbotar eta gasteiztar ikusiko Ataungo bide luzeetan barna, ezta hainbeste gipuzkoar Sakanan ere, onddotarako asmoz ez bada behintzat.
Nolanahi ere, azken urteotako mobilizazio ikusgarrienetakoa izango dela dudarik ez da. Kilometro horiek guztiak jendez mukuru betetzeko lan eta antolaketa handia beharko da eta jada metroen erdia baino gehiago salduta dago; herrietan hamarnaka talde ari dira sustapenean eta antolatzaileek arrakasta segurtzat eman dute.
Gure Esku Dago dinamikak ibilbidea ezagutzeko hainbat baliabide sortu du. Bideo honetan giza katea nondik pasako den ikus daiteke airetik hartutako irudi digitalen bidez:
Googleko mapa honetan bidea berdez markaturik dago:
Eta fitxa honek herri bakoitzari dagokion kokapena adierazten du:
Iruzkinik ez
Trackbacks/Pingbacks