Kutxako estatutu berrien egileei azalduko die Gipuzkoako Aldundiak bere proposamena, Iturbek gonbidatuta

Atalak: Ekonomia, Gizartea

Martin Garitano ahaldun nagusiaren esanetan “hitz egiteko prest egoteak esperantzarako atea irekitzen du”. Kutxabanken kontrol publikoa mantentzeko Gipuzkoako Aldundiaren proposamenari  argudioekin baino deskalifikazioekin erantzutea egotzi die oposizioko alderdiei.

Kutxa banku fundazio ez bihurtzeko Gipuzkoako Aldundiak txosten juridiko batean oinarrituta mahairatutako alternatibari (pdf) hitz gogorrez erantzun diote oposizioko zenbait politikarik: “Ez da serioa”, “arduragabea da”, “legez kanpokoa eta fantasiosoa da”… Baina lehen aldiz, Kutxa moduko erakunde batek sikiera proposamena entzungo duela esan du.

Martin Garitano Gipuzkoako ahaldun nagusiak eta Larraitz Ugarte aldundiko bozeramaileak jakinarazi dute Xabier Iturbe kutxako presidenteak gonbidapena luzatu diela, Kutxaren estatutu berriak egiten ari diren batzordean azalpenak emateko.

Bestalde, Garitanok Javier de Andres eta Jose Luis Bilbao Araba eta Bizkaiko ahaldun nagusiei eskatu die alternatiba kontuan hartzeko: “Denon artean hitz egin dezagun Kutxabanken izaera soziala eta publikoa bermatzeko”. Erantzuna berehalakoa izan da. Unai Rementeria Bizkaiko Aldundiko bozeramailearen hitzetan proposamena “okurrentzia” bat besterik ez da eta ez dute baloratu ere egingo.

Proposamenak aurreikusten du Kutxak Kutxabanken dituen akzioen gehiengoa foru erakundearen eta udalen artean banatzea –“oparitzea” aditza erabiltzen ari da Gipuzkoako prentsa kontserbadorea–. Modu horretan ez luke banku fundazio bihurtu behar izango eta egungo ordezkaritza eta kontrol organoei eutsiko lieke, erabat patronoen esku geratu gabe. Udalek eta Aldundiak, Kutxabankeko etekinak Kutxari itzuliko lizkiokete gizarte ekintzan inbertitzeko.

Patronoen aukeraketa: Gipuzkoan ere aurrera

Kutxan aginduko duten balizko patronoen aukeraketa prozesua aurrera doa Batzar Nagusietan. Noticias de Gipuzkoak EAJ, PP eta PSEren hautagaien berri eman du. Tartean dira, besteak beste Antonio Campos, urte luzez Gipuzkoako Ikastolen Elkarteko presidente izandakoa edota Guillermo Echenique, Patxi Lopezen garaian Kanpo Ekintzako kontseilari izandakoa eta Kutxako lehendakari orde ohia.

Bilduk, Donostiako Udalak eta Gipuzkoako Aldundiak ez dituzte oraindik euren hautagaiak aurkeztu. Martin Garitanoren esanetan patronoak Batzar Nagusietan aukeratzea ez da ezeren berme “instituzio honek ez duelako gerora pertsona horien erabakietan eragiteko inolako modurik izango”.