Dena prest Kutxaren Batzar Orokorrak bere burua desegiteko

Atalak: Ekonomia, Gizartea

Kutxaren administrazio kontseiluak eragotzi egin du Gipuzkoako Foru Aldundiaren proposamena batzar orokorrean eztabaidatzea. CCOOk ere kontra bozkatu du. Ezustekorik ezean, urriaren 29an Kutxa banku fundazio bihurtu eta patrono batzuen eskuetan geratuko da.

CCOO sindikatuak ere –EAJ, PSE eta Pixkanakarekin batera– aldundiaren proposamena eztabaidatzearen kontra bozkatu du administrazio kontseiluan. Sindikatua abstenitu egingo zela zioten albisteak zabaldu ziren, baina ohar bidez azaldu zuen ez duela Kutxaren inguruko posizio “organikorik” eta bere ordezkari Victoria Juana Alquézarrengan  “aginpide loteslerik”. Segidan, ordea, aldundiaren proposamena “berandu” datorrela dio oharrean CCOOk, eta izatekotan, Eusko Legebiltzarrean eztabaidatu beharko litzatekeela.

Hala, BBK eta Vitalen egin moduan, itxura guztien arabera Kutxa banku fundazio bilakatzea babestuko du CCOOk. Kasu honetan gainera bere eskuetan du giltza, indarrak oso orekatuta daudelako. Giltza hori nola eta zertarako erabiltzen ari den, inkognita bat da.