Xabier Iturbek onartu du Kutxako patrono izateko Batzar Nagusien proposamena ez dela loteslea

Atalak: Ekonomia, Gizartea, Uncategorized

ARGIArekin izandako elkarrizketan (2434. zenbakian argitaratuko da) Xabier Iturbe Kutxako lehendakariak onartu du banku fundazioan aginduko duten patronoak legez ezin dituztela Gipuzkoako Batzar Nagusiek izendatu, baina hala izan dadin “mekanismoa” sortu dutela dio.

Lau egun barru, urriaren 24an, erabakiko du Kutxaren batzar orokorrak banku fundazio bihurtuko den ala ez. Gipuzkoako Aldundiak Kutxa fundazio arrunt bihurtzeko mahairatutako alternatiba (pdf) eztabaidatu ahal izango den galdetuta , “seguru gai hau aterako dela” esan digu Iturbek.

Batzar horretan, etorkizuneko banku fundazioaren balizko 15 patronoak ere izendatuko dira, erakundean erabakimen osoa izango duten patronatuko kideak alegia. Patronoak Gipuzkoako Batzar Nagusiek proposatzea aurreikusten dute estatutu berriek (pdf); Kutxaren kontrol soziala mantentzen omen da horrela. Aitzitik, Iturbek ARGIAri onartu dio proposamen hori legez ez dela loteslea:

“Juridikoki ez dugu loteslea jarri, zeren eta hori joan zitekeen legearen kontra. Legeak esaten du patronoak patronatuak izendatu behar dituela. Baina Batzar Nagusietatik ateratako izenak zuzenean patrono izateko mekanismoa sortu dugu”

Patronatuak izen horiek atzera bota ditzake, hainbat irizpide (bateraezintasunak, profesionaltasuna…) betetzen ez dituztela ikusten badu, eta zuzenean izendatu ditzake berak aukeratutakoak. Beraz, giroa gaiztotuz gero, patronatuak badauka helduleku legala berari ondo iritzi zaizkion patronoak jartzeko, eta Kutxan giroa ez da lagunartekoa preseski. Ez da ahaztu behar Iturberen beraren izendapena –2012ko batzar iskanbilatsu hartan– auzitegietan dela momentu honetan.

Elkarrizketan barrena, eztabaidarako  iturri izan daitezkeen beste makina bat baieztapen egiten ditu Iturbek, segida pare bat adibide aurrerapen gisara.

Pribatizatzea, kontu korporatibo bat:

“Ez dakigu non amaitu dezakeen Kutxabankek, guk eramaten dugun tokian edo merkatuak eramaten duen tokian amaituko du (…) Kutxabanken erronka ez da pribatizatuko den ala ez, ez dira kontu korporatibo horiek, erronka nagusia da negozio sendo bat edukitzea”

Frakdun kobratzaileak:

“Kondarrak kobratzeko ahalmenik ez dugunez, frakdun kobratzailearen antzera aritzen diren enpresa espezializatuak daude eta beraiek kobratzen dute. Hori orain eta begi egin izan da”