Moneta sozialez nazioarteko mintegia Arrasaten

Atalak: Ekonomia, Gizartea

Bristolgo “pound” moneta hiriko 600 komertziotan sareratu da eta udaleko 17.000 langileek soldataren portzentaje bat diru horretan kobratzen dute.

Tokiko ekonomia eta kontsumo ereduak eraldatzeko moneta sozialek sortzen dituzten aukerez hitz egingo dute asteazkenean, hilak 29, Garaia Berrikuntza Gunean.Europan gero indar handiagoa dute moneta sozialek: Alemaniako Chiemgauer mugimenduan biltzen diren 30 moneta ezberdinak, Bristol hiriko “Pound” edo Okzitaniako Tolosako “Sol Violette” aipa daitezke esaterako. Euskal Herrian ere ugaritzen ari da tokiko ekonomia sustatzeko finantza baliabide alternatibo hori, Bilboko “Ekhia”, Ipar Euskal Herriko “Euskoa” edota Oñatiko “Txantxia” dira horren lekuko, besteak beste.

Bertoko eta kanpoko esperientzia horien berri izan eta haien inguruan hausnartzeko nazioarteko mintegia antolatu dute Arrasaten Gipuzkoako Foru Aldundiak, Mondragon Unibertsitateak eta Bagarak. Jardunaldia egun osokoa izango da eta bi zatitan banaturik dago.

Nazioarteko adituak

Goizean, gaian adituak diren bi hizlarik hitz egingo dute: Susana Martin Belmonte Moneta Sozialaren Institutuko kideak eta New Economics Fundationeko Leander Bindewald-ek.

Martín Belmontek hamaika hedabidetan parte hartu du finantza alternatiboez hitz egiteko. Irudian TVE2ko dokumental batean.

Belmonte ekonomista da, Nada esta perdido. Un sistema monetario y financiero alternativo y sano liburuaren egilea eta Soberania Financiera bloga kudeatzen du. Horrez gain, Katalunian moneta osagarri bat sortzeko EuroCat proiektuko sustatzaileetako bat ere bada.

Bindewaldek munduko hainbat tokitan dibisa alternatiboak txertatzeko parte-hartze prozesutan lagundu izan du. Arrasaten Europako moneta sozial eta osagarrien mapa marraztuko du.

Hitzaldi horien ondoren, beste bi kide elkartuko zaie mahai-inguruan: Kataluniako RES erakundeko kide den Josep Lluis de la Rosa eta Euskal Moneta elkarteko Maia Larronde.

Eztabaidatuko diren gaien artean honako hauek daude: moneta sozialaren erabilgarritasuna tokiko garapenerako, beste moneta batzuekiko osagarritasuna, krisi garaietan izan dezaketen funtzioa, edota kontsumoa eredua kontzienteki eraldatzeko gaitasuna.

Bigarren zatia arratsaldean izango da eta zehazki Debagoiena eskualdeko eragileei zuzenduta dago, eraldaketa sozialerako moneta sozial bat inplementatzeko aukerak aztertuko dituzte.

Mintegiaren programa eta informazio gehiago Mondragon Unibertsitateko Lanki Ikertegiaren webgunean aurki daiteke, eta Twitter bidez #FinanLab traola erabiliz jarraitu ahal izango da.

#FinanLab Tweets
!function(d,s,id){var js,fjs=d.getElementsByTagName(s)[0],p=/^http:/.test(d.location)?’http’:’https’;if(!d.getElementById(id)){js=d.createElement(s);js.id=id;js.src=p+”://platform.twitter.com/widgets.js”;fjs.parentNode.insertBefore(js,fjs);}}(document,”script”,”twitter-wjs”);