‘Kutxabank auzia’ artxibatzeko bidean?

Atalak: Ekonomia

Kutxabankeko presidente ohi Mario Fernández eta EAEn Espainiako Gobernuko delegatu izandako Mikel Cabieces Carmen Adam fiskalaren aurrean izango dira, azkeneko honek irregularki hilero jasotzen zuen 6.000 euroko soldataren inguruan azalpenak emateko.

Fiskalak delitu sozietarioa egotzi diezaieke ustezko irregulartasun horiengatik eta auzia epaitegira bidali, alor penalean ikertu dezaten. Kode penalak 6 hilabete eta 4 urte arteko kartzela zigorra ezartzen du halako delituengatik –edo iruzurretik jasotako etekinaren halako hiruko isuna–, baina “zuzenean galera ekonomikoa” eragiten badu.

Fernándezek berehalakoan itzuli ditu 243.592 euroak bere poltsikotik eta Kutxabankek berak hasieratik esan du dirua berreskuratu duela eta ez duela “galerarik” izan. Hortaz, ez legoke deliturik?

Fiskalak ekinbidea zein azkar abiatu duen ere harrigarria iruditu zaio askori, astebete ez da igaro eta jadanik deklaratzera deitu ditu inplikatu nagusiak, ikerketarako sei hilabeteko epea duen arren.

El Diario.es egunkariak fiskaltzako iturriak aipatuz dio dirua itzuli izanak soilik ez duela eragindako galera ezabatzen, eta izatekotan, kasua epaitegietara iritsiz gero “aringarri” bat izango litzatekeela.

Bestalde, otsailaren 5ean El Diario Vascok paperezko edizioan argitaratu zuenez Kutxabankek bere zerbitzu juridikoak erabili beharrean Madrilgo Rodríguez Mourullo abokatu ospetsuarengana jo omen du, Emilio Botin, Gürtel edota Bankia moduko kasuetan zaildua. Horrek, egunkari kontserbadorearen ustez, esan nahi du Villalabeitia prozesu luze eta gogor baterako prestatzen ari dela.