Urkullu: “Gipuzkoako Aldundian ba al dago ate birakaririk?”

Atalak: Ekonomia

Eusko Legebiltzarreko kontrol plenoan, besteak beste Kutxabanken ordainketa irregularren auziaz azalpenak eman ditu Iñigo Urkullu EAEko lehendakariak.

Oskar Matute EH Bilduko parlamentariak Cabieces-Fernandez auziaz eta “ate birakariez” azalpenak emateko eskatu dio Iñigo Urkulluri. Honek erantzun du esanez “testuingurua” inportantea dela: “Egon dira kasuak Espainiako Gobernuko delegatuak erailak izan direna, horregatik da garrantzitsua testuingurua“, esan du.

Ate birakarien inguruan honako galdera egin dio Urkulluk EH Bilduko kideari: “Azalduko didazu ea Gipuzkoako Aldundian ate birakaririk ote dagoen?”. Lehendakariaren ustetan Kutxabankek berak fiskaltzaren aurrean salaketa jarri izana da erakundearen kontrolerako bermea erakusten duena.

Gorka Maneiro UPyDko eledunak Urkulluri galdetu dio ea zer neurri hartuko dituen “erantzukizunak garbitzeko” eta ea ba ote duen antzeko beste kasuen berririk. Maneirori “arraroa” egiten zaio EAJk Kutxabanken gertatzen ari zenaz “ezer ez jakitea” eta “Euskal alderdi nagusien” artean izandako “itun ezkutuak” argitzeko eskatu du.

Urkulluk Kutxabanken kaudimena eta orain arteko ibilbidea goretsi ditu eta Mario Fernandezi bere “esker ona” adierazi dio horregatik. Lehendakariak esan du gertaeren sekuentzia kronologikoa ezaguna dela: “Mario Fernandezek berak azaldu zuen eta gaur egun arte inork ez du gezurtatu”. Eusko Jaurlaritzak “justiziari errespetua” agertuko diola ere esan du eta “zuhurtziaz” agertuko dela, “Kutxabanken prestigioa salbatzeko konprometitua dagoelako”.

Antonio Danboreneak (PP) “lege ez idatzien” inguruan hitz egin du eta esan du ez duela ulertzen Urkulluk “terrorismoaren kontrako borroka” argudiatzea “helburu laudagarri batek bitartekoak justifikatzen dituela” esateko, “guk hori ez dugulako inoiz defenditu”. Urkulluren erantzuna “Hemen norbaitek ‘lege ez idatzien’ bidez jardun izan badu, hori ez da EAJ izan, eta ez dut gehiago jarraituko”.