Martiodako dorrea, harriz harri

Atalak: Historia, Uncategorized

Arabako Hurtado de Mendozatarren dorretxearen egoera kaskarrak kezka sortu du. Ondare Babesa arkeologia taldeak argazki bidez dokumentatu du Erdi Aroko eraikin historikoa.

Gasteizko Martioda herrian lekututa, arro ageri izan da zortzi mendetan Hurtado de Mendozatarren dorretxearen soslaia. Eraikin erraldoia toki estrategikoan jaso zuten Erdi Aroan, XVI. mendean kartzela gisa erabili izan zen, baina gerora izaera militarra galdu eta jauregi bihurtu zen. Duela 40 urte Arabako Aldundiaren esku geratu zen eraikina.

2002an Eusko Jaurlaritzak kultura ondasun izendatu zuen dorretxea, bere balio historiko eta arkitektonikoa aintzat hartuz. Aitzitik, kontserbazio falta dela-eta sasiak janda dago eta barrualdeko egurrezko egitura erori egin da, baita dorrearen teilatu zati bat ere.

Egoera kaskar horrek kezka handia sortu du. Arabako Batzar Nagusietako EH Bildu taldeak Kultura diputatu Igone Martinez de Lunari eraikinaren inguruan galdegin zion joan den azaroan eta 450.000 euroko diru partida ere eskatu zuen dorretxea zaharberritzeko.

Kultura diputatuak iragarri zuen “urgentziazko neurriak” hartuko dituztela eraikinean, segurtasuna bermatu eta suntsipen prozesua geratzeko. Hala, dorretxea hesitu eta garbiketa lanak egin dituzte lehenik, eta berreskuratze lanei ekiteko informazio zehatza eskuratu dute ondoren.

Ondare Babesa arkeologia enpresa aritu da zeregin horietan. 2011n zenbait zundaketa arkeologiko (pdf) eginak zituen enpresa honek toki horretan eta, besteak beste, dorretxea inguratzen zuen lubanarroaren aztarnak aurkitu zituzten.

Oraingoan dorretxearen barrualdean indusketak egin ditu, eta horrez gain kanpoaldea grafikoki dokumentatu du dron bat erabilita. Bere blogean zenbait argazki ikusgarri jarri ditu.