Munduko ekonomia alarma gorrian: aste honetako bost lerro-buru nagusiak

Atalak: Ekonomia

Davosen egiten ari diren Munduko Ekonomia Foroan hainbat gai aztertuko dituzten arren, zalantzarik gabe munduko turbulentzia ekonomikoak izango dira protagonista. Krisi globala ate joka dugula dioten lerro-buru kezkagarriak irakurri ditugu aste honetan.

Txinako ekonomia hazkundea azken 25 urtetako mantsoena izan da 2015ean

Txinako urte arteko hazkundea %6,9koa izan da, herrialde hartako Estatistikaren Nazio Buroak emandako datuen arabera. Azken bi hamarkadetan %10etik gorako hazkundea izan du Txinak eta datu hori 25 urteetako baxuena da. Zenbaiten arabera Txina beste hazkunde eredu baterantz egiten ari da, zerbitzuetan eta klase ertainaren kontsumoan oinarritua. Nolanahi ere, erraldoi asiarraren mantsotzeak herritarren ongizateaz ardura handirik ez duten inbertitzaileak urduritu ditu eta Txinako burtsen gorabeherek munduko finantzetan ere eragina izan dute.

Petrolio upela 2003ko prezioaren azpitik jarri da
Lurralde Petrolio Esportatzaileen Erakundeak produzitzen duen petrolio upela 25 dolarren azpitik jarri da. Hala, bosgarren aldiz jarraian egin du behera upel horrek eta 2003tik hona urre beltzak izan duen preziorik merkeena du orain. Londresko merkatuak arautzen duen eta Europan erreferentziazkoa den Brent upela ere minimo historikoan dago: 27,72 dolar, hau da, 2004tik hona preziorik merkeenean. Peak oila jo dugula gero eta nabarmenagoa den une honetan, petrolio esportatzaileek dirua behar dute eta ez daude prest produkzioa jaisteko. Aitzitik, mundu mailako eskaria gutxitu egin da krisiaren ondorioz eta lehengaietatik bizi diren herrialdeak egoera larrian daude.

Munduko hazkundearen aurreikuspena jaitsi egin du Nazioarteko diru Funtsak
Bi hamarren jaitsi du NDFk munduko ekonomiaren hazkunde aurreikuspena. Erakunde horren arabera, 2016an hazkunde globala %3,4 izango da eta 2017an %3,6. NDFk bi hamarren jaitsi du, beraz, aurreikuspena. Londresen asteartean egindako aurkezpenean azaldu zutenez, batez ere garatze bidean dauden herrialdeen ekonomiak sorturiko zalantzen ondorioz errebisatu dute beherantz hakzundea; Brasilen esaterako, %3,5eko beherakada izango luke 2017an ekonomiak. Txinaren mantsotzea, petrolioaren beherakada eta AEBetako moneta politikak zorrotzak zenbait herrialderi sorturiko finantzazio arazoak ei dira hazkunderako arrisku nagusienak.

Europako burtsak hondoratu egin dira lehengai merkeek sorturiko zalantzen ondorioz
Europako burtsen indize nagusia den FTSEurofirst-ek %3,44 egin zuen behera urtarrilaren 20an ireki eta berehala. Asteazken beltzak Europako eta munduko burtsa nagusiak harrapatu zituen, joan den urtean Txinak sorturiko finantza izualdiak 2016an segida izango duela agerian utziz, inertziaz bada ere. Wall Streetek ere %3,5 egin zuen behera eta Espainiako Ibex 35 indizeak urtebetean %13 galdu du jadanik. Petrolioaren beherakadak, AEBetako ekonomiaren agorraldiak eta Txinaren norabide aldaketak inbertitzaileengan sorturiko beldurra Italiako bankuetan islatu da nabarmen: Monte de i Paschi %18 galtzera iritsi zen asteazkenean, Milango burtsak kiebra saihestearren kotizazioa etetea erabaki zuen arte.

Financial Timesek irudi hau jarri zuen bere webguneko azalean urtarrilaren 20an, burtsek bizitako izualdia ilustratzeko.

200 milioi langabetu iragarri ditu Lanaren Nazioarteko Erakundeak
2015 urteak 197 milioi pasa langabeturekin amaitu zuen eta 2017an munduan 200 milioi pertsona lanik gabe egongo dira Lanaren Nazioarteko Erakundeak (LANE) egindako azterketaren (pdf) arabera. Munduko ekonomiaren uzkurtzea eman du arrazoi nagusitzat iragarpen hori egiteko. Era berean, erakundeak enpleguaren kalitatean jarri du azpimarra: garaturiko herrialdeetan enplegua sortu den arren, kalitate eskasekoa eta prekarioa izan da, eta mundu osoan enplegu “kaltebera” –autonomoak eta ordaindu gabeko familia lanak– kopuru osoaren %46 da, 1.500 milioi pertsona bizi dira lan-baldintza eskas horiekin.