Europako eredu ekonomikoa eraldatzeko alternatibak aztertuko dituzte Bruselan

Atalak: Ekonomia

Ekonomia Sozial Eraldatzailearen Europako I. Foroan hainbat herrialdetako aditu eta eragileak bilduko dira, esperientziak trukatu eta ekintza zehatzak proposatzeko. ARGIAk bertatik bertara jarraituko du jardunaldia.

Egungo sistema neoliberala dardarka ari dela gero eta zantzu gehiago daudenean, batzuk Davos moduko eski estazioetan gotortzen dira. Bestetzuk, aldiz, ari dira bideak aurkitzen kultur paradigmak eraldatu eta pertsonengan oinarritutako ekonomia sortzeko.

GUE/NGL talde parlamentarioak antolatuta European Forum on Social and Solidarity Economy (EFSSE) egingo dute urtarrilaren 28an Bruselan. Egun osoz, adituen konferentziak, esperientziak, bideo-forumak eta tailerrak izango dituzte bertaratuek.

Europako hainbat herrialdetatik joandako ordezkariak izango dira hizlari. Esaterako, Ourania Antonopoulou Greziako Gizarte Babeserako ministroak herrialde heleniarrean izandako esperientziaz hitz egingo du. Jean-Louis Laville ekonomia solidarioaren katedradunak eta esparru horretan mundu akademikoan erreferentzia nagusietakoa denak, berriz, paradigma berrirantz nola egin dezakegun aztertuko du. Antolatzaileek hizlarien profilak eta programa osoa zintzilikatu dituzte foroaren webgunean.

Euskal Herriko delegazio bat ere izango da jardunaldian, GUE/NGL taldekoa den EH Bilduk gonbidatuta, tailerretan parte hartu edo hitzaldiak ematen. Hernaniko alkate Luix Intxauspek (EH Bildu), esaterako, Beterrin martxan jarritako garapen agentziari buruzko azalpenak emango ditu.

Ekonomia sozial eraldatzaileko edo solidarioko sareak, ikertegiak eta finantza etikoan dabiltzan Euskal Herriko elkarteak izango dira Bruselan, baita hainbat hedabidetako kazetariak ere.

ARGIA ere han izango da eta egun osoan egingo dugu foroaren zuzeneko jarraipena sare sozialetan eta blog honen bidez.