#ESEbruselan | Ahuntzak eta finantzak

Atalak: Ekonomia

Goran Jeras Ebanka-ko arduraduna da, finantza etikoen arloan Kroazian lehenengo banku soziala sortzeko lanean ari den kooperatiba. Gaur erakutsi digu finantzen mundua Wall Streeteko areto hiperpantailaduna baino askoz oinarrizkoagoa eta sinpleagoa dela.

Kroazian eta inguruko herrialdeetan uholde oso larriak izan zituzten 2014ko maiatzean. 1,2 milioi lagun lekuz aldatu behar izan zituzten eta 40 hildako izan ziren gutxienez. Baina horrez gain, ibaiek kalte larriak eragin zituzten nekazal guneetan. Laborarik askok euren lurrak galdu zituzten.

“Gu herrialdeko hainbat tokitan izan ginen lanean –dio Jerasek–. Kroazian, ganaduari dagokionez, ahuntzak zati oso garrantzitsua dira. Lurrak galdutako laborari horiek euren ahuntzak utzi zizkiguten. Orain, banku etikoan elkar-trukerako talde solidarioa daukagu, eta batez ere ahuntzak banatzen ditugu gizarte bazterketan erortzeko zorian daudenen artean”.

Diruarekin soilik ez, ahuntzekin ere egin daitezke finantza operazio eraldatzaileak. Kanpaina horrek emaitza oso onak eman ditu Jerasen esanetan. Bere ustez, mota horretako adibideak baliagarriak izan daitezke beste udalerrietan eta solidaritatean oinarritutako beste jendarte bat sortzeko bidean: “Garrantzitsua da horrelako hartu emanak izatea, Kroazian funtzionatzen hasi den zerbait da. Ni oso baikorra naiz etorkizunari dagokionez”.