#ESEbruselan | K136: ura gure kabuz ala hil!

Atalak: Ekonomia

Politikariak hitz egiten hasi eta berehala sutu da etxea. Ekonomia sozial eraldatzailearen foroan talde parlamentarioen txanda izan da arratsaldean. Denetarik izan da, Greens/ALE taldeko Karima Dellik hitz egin du agian sutsuen: “Ez dizuet gezurrik esango, Europa ez doa ondo. Aurreko markoa hilzorian dago, erresistituko da, baina hilzorian dago. Denon artean beste marko bat sortu behar dugu”.

Ekitaldia antolatu duen GUE/NGL taldeko Marie-Chirstine Vergiat ere gogor aritu da zenbaitetan, batez ere saioan parte hartu duen Europako Batzordeko kideari erantzuteko orduan: “Zifra asko eman dituzue, baina utz gauzak nahasteari. Zer da social business delako hori? Ez sartu dena zaku berea mesedez!”. Enpresa sozialaren inguruko eztabaida kontzeptuala behin baino gehiagotan agertu da jardunaldi osoan eta badirudi aurrera begira soka luzea ekarriko duela.

Entzuleek ere hitz egin ahal izan dute eta gogor egin dute hauek ere: “Hemen dena oso ondo dagoela entzun dut, baina etxea sutan dago. Zer egingo duzue foro hau eta gero?”.

Greziako pertsona batek K136 ekimenaz hitz egin du. Tesalonican uraren gestioa modu komunalean eramateko proiektua, kooperatibetan oinarritua. Tesalonicako ekimena ez da saio horretan soilik aztertu, foroan aldi berean egin diren beste hainbat tailerretan ere hitz egin da horretaz. Finantzazioari buruzkoan, adibidez: “Proiektu politiko oso zehatza da, adibide on bat izan litekeena”, tailerreko arduradunaren esanetan.

Greziako ordezkariak garbi utzi du Tesalonicako uraren konpainia herritarrek berreskuratzeko ekimenaren garrantzia: “Badaukagu plan sinesgarri bat ura berreskuratzeko, zeren-eta beste alternatiba pribatizazioa da. Milioi bat lagunen babesa duen ekimena da gurea. Zer egingo du GUE taldeak uraren gestioaren arloan? Hemen nago hori galdetzeko”.

Jakina, erantzun zehatzik ez du jaso, baina Marie-Cristhine Vergiat-en esaldi batek garbi utzi du alderdi horren posizioa: “Lehiakortasunaren printzipioa hilgarria da guretzat”.