Burgosko prozesuaren audioa berriz argitaratu dute

Atalak: Historia

1970ean frankismoari lotsak ateratzea lortu zuen ETAko militanteen kontrako gerra kontseiluaren grabazioa berriz masterizatu du Sapiens aldizkariak eta CD formatuan eskainiko du epaiketaren azken zatian 16 auzipetuek eginiko plantoaren audioa.

Frankismoaren kontrako borrokan mugarri bat izan zen Burgoseko prozesua: ETAko 16 militanteak epaitu beharrean, erregimena bera auzitan jartzea lortu zuten, jendartea eta nazioartea mobilizatu eta iratzarriz. Gertaera historiko hartatik dokumentu baliotsu bat geratu zaigu: 1970eko abenduan Madrilen egin zen epaiketaren audioa. Sapiens aldizkari katalanak berriz masterizatu eta esklusiban argitaratu du.

Grabazioa ezkutuan hartu zen epaiketa salan magnetofoi bobinatan, eta haren zati bat –Mario Onaindiaren interbentzioak sortzen duen iskanbila islatzen duena– editatu, biniloan argitaratu eta klandestinoki zabaldu zen, esaterako Radio España Independienten –Pirenaica izenez ezagunagoa–. Orain arte, Imanol Uriberen Burgosko prozesua (1979) dokumental esanguratsuan entzun ahal izan ditugu, esaterako, Onaindiaren “Gora Euskadi Askatuta!” oihua, prozesatuak Eusko Gudariak kantatzen eta epaiketa aretoan sorturiko zalaparta guztia, zapaldutako herri baten ikur bihurtzeraino.

Sapiensek martxoko alearekin banatuko du CD formatuan –oraingoan publikoki eta errepresioaren beldurrik gabe– 70eko hamarkadako audioa berriz masterizatua: “Garai hartan kokaturiko gertakizun historikoari fidelak izatearren, euskarazko eta gaztelaniazko hasierako azalpen laburrak eta amaierako Eusko Gudariak kantua mantendu ditugu, grabazioari ondoren erantsi bazitzaizkion ere”, azaldu dute historia aldizkariaren webgunean.

Aurkezpena martxoaren 3an egingo dute Kataluniako Historia Museoan, eta besteak beste, prozesuan abokatu aritu zen Miguel Castellsek eta Antoni Batista kazetariak hitz egingo dute. Azkeneko honek erreportaje zabala osatu du Sapiensen, 1970eko gertaeren gako nagusiak emanez; horretarako Lazkaoko beneditarren artxiboan eta polizia frankistaren dokumentazioan miatu du.