Repsol, demonioak hemen eta han

Atalak: Sailkatu gabea

Davoseko talaimendi distiratsu eta zuritik hitz egin digu Repsoleko sheriffaren ahotsak, denok entenditzeko moduan: “We have to broaden our mind”. Alegia, mentalitatea zabaldu behar dugula, ezin dugula pentsatu erregai fosilik gabe bizi gaitezkeenik. Ze uste zenuten zozomikoteok… Eta behin belearena egiten hasita, beretzako moldatu du desazkundearen defendatzaile askoren printzipioa: “Decarbonizing is not electrifying”. Trantsizio energetikora hurbilketa ideologikoa egiten ari garela –beraien patrikak ideologiarik ez balu bezala–. Ezin direla hegazkinak, kamioiak eta industriak argindarrarekin soilik mugitu. Behar ditugula bere findegiak, bere diesel eko eta bio likatsuak, munduak funtzionatuko badu.

Ez da lehen aldia. Josu Jon Imazek denbora darama matraka berarekin, erregai fosilak “demonizatu” egin direla esaten. Baina oraingoan Teresa Ribera espainiar superministroak erantzun dio buruzagi jeltzale ohiari: uzteko mesedez diskurtso populistak alde batera. Eta hori guztia EAEn bere alderdiak PSE-EE eta EH Bildurekin Trantsizio Energetikorako Legea adostu bezperatan… Albiste izan behar zuen noski.

Txirritak Albaiteruen salako bertsoan ikusitako demonioekin bezala, diskulpatzen aritu zen Josu Jon Davosen, bera eta bere elitekoen gasolina-katxi parrandagatik. Ajearekin beste gauza batzuk ahaztuta izango ditu akaso. Esaterako, bi urte direla Peruko kostaldean Repsolek sekulako hondamendi ekologikoa eragin zuela eta hango milaka arrantzale oraindik protestan direla kalteak ez dituztelako konpondu. Horrek ez du hainbeste oihartzun izan mass-mediatan.

2022ko urtarrilaren 15ean La Pampilla findegian milaka tona petrolio upel isuri ziren itsasora, eta kostaldeko 1.780 kilometro koadro kutsatu zituen marea beltzak. Gaur egun, inguruko 30 hondartzatik 25 oraindik erabat zikinduta daude eta itsas hondoko eremu zabal batek kutsatuta jarraitzen du. Arrantzatik bizi ziren milaka herritar ezer gabe geratu dira eta Repsolek jarraitzen du kargu egin gabe eta indemnizazioak ordaintzeari iskin egiten. Hori dela eta, salaketa kolektiboa jarri diote Herbehereetako GKE baten bidez.

Bigarren urteurrena bete den egunean, konpainia petrokimikoaren Limako egoitza aurrean elkarretaratu dira: “Repsol ecocida, Repsol asesina!”. Agian haiei ere esango die Imazek mentalitatea zabaldu behar dutela? Demonioak beti gorputzaren bueltan…