Gutxieneko borondate politikoa

Atalak: Ekonomia, Gizartea

Lanbide arteko Gutxieneko Soldata (LGS) propio bat lortzeko euskal sindikatuen borrokak, hamaika kapitulu izan ditu dagoeneko. Eta hamabigarrena badator: Confebask patronala auzitara eramango dute, mahai negoziatzailean esertzen derrigortzeko. Izan ere, pasa den urrian, patronaleko arduradunak Lan Harremanen Kontseiluan zuten bilerako mahaitik altxa ziren –azken hilabeteetan hirugarrenez–, esanez gutxieneko soldataren eskumena estatu mailakoa dela eta ez daudela ezer negoziatzera derrigortuta.

Eusko Jaurlaritzak, bere aldetik, gutxieneko soldatak hobetzea patronalaren eta sindikatuen ardura dela dio, eta lan hitzarmenen bidez adostuta lortuko dela hori. Baina biak maila berean jarrita, ez al zaio betorako eskubidea ematen mugitzeko interes gutxien duenari? Patronalari?Hain justu, beto hori gainditzeko aurkeztu zuten ELA, LAB, ESK, Steilas, Hiru eta Etxalde sindikatuek, 138.495 herritarren babesarekin, gutxieneko soldatari buruzko HEL herri ekinaldi legegilea Eusko Legebiltzarrean. Patronala mugiarazteaz gain, hitzarmen kolektiboetatik kanpo geratzen diren sektore prekarizatuenetan –emakumeak, pertsona arrazializatuak, gazteak…– dauden soldata arrakalak gutxitzea ere bada LGS propio bat lortzeko arrazoietako bat. Baina eztabaidatzeari uko egin diote Eusko Jaurlaritza sostengatzen duten EAJk eta PSE-EEk. Hemen ere arrazoi bera: ez dela erkidegoaren eskumenekoa.

Ekinaldia bultzatu duten sindikatuen ustez, aldiz, badago legezko modu bat Hego Euskal Herrian gutxieneko soldata propioa lortzeko: Espainiako langileen estatutuko 27. artikulua moldatuta, lanbide arteko gutxieneko soldata ezartzen duena, hain zuzen. Horretarako, jakina, adostasun maila handiak beharko lirateke. Egingarria da?

Pedro Sánchezen gobernu ahuldua estutzeko makina bat botoi dauzka EAJk bere nabigazio mandoan, orain AHTren obrak desblokeatzeko, orain Gernikako Estatutuaren transferentziak konplitu arazteko, espainiar presidentea inbestitzeko akordioan jasota dagoen bezala: “Bestela larria izango da”, mehatxu egin dio Aitor Esteban jeltzaleen buruak. Ezin ahaztu, ezta ere, Eusko Legebiltzarretik bultzatutako beste ekinaldi batzuk aurrera atera izan direla –amiantoaren biktimentzako konpentsazio funtsa, esaterako–, edo ez dela lehen aldia Espainiako langileen estatutua ukitzen dela –erkidego mailako lan hitzarmenak lehenesteko sektorekoen aurrean, kasurako–. Gutxieneko borondate politikoa, hori da falta dena.