Jesus Egiguren: “Erabakirik hartu gabe hobe doakigu”

Atalak: Gizartea, Politika

Erabakitzeko eskubideaz Hamaikak hasitako Pausoan telebista saioan esan ditu hitzok PSE-EEko presidenteak: “Ez erabakitzeak lagundu egiten du ez zatitzen”.

Gure Esku Dago ekimenak erabakitzeko eskubidearen alde antolatutako ekainaren 8ko giza katea gero eta gertuago den honetan, hainbat politikariren iritziak bildu dituzte Pausoan saioan, besteak beste, berrikitan liburua argitaratu duen Jesus Egigurenenak. Hauek dira berak esandakoetako batzuk:

“Nik ez dut sinesten erabakitzeko eskubidea eta independentzian eta horietan, hemendik urtetara gauza hori diskutitzen jardungo gara, baina oraingo bidetik geldituko gara Extremadura, Andaluzia eta beste edozein autonomia bezala. Eta aldiz, ez dugu probatu bide posible eta berri hori, Europan nazio inportantea egiten gaituena. (…)

 

Erabakitzeko eskubide hori… gaurko marko politikoa aldatuz joatea kontsentsuaren bidez. Gaur erabakitze hori hartuko bagenu, herria zatitua geratzen da. Hori ez da ona. Aurrera joan behar dugu baina kontsentsua eginez. (…)

 

Independentzia %80ra iristen bada, legeak edo konstituzioek gauza bat esan edo ez, independentzia lortzen da (…)

 

Erabakitzeko eskubidea bera planteamendu zaharra da: soberania bakarra, nazio bakarra… gauza horiek kuestionatuta daude. Ertzainek txapelgorria eramaterik ez dute Europak galarazi duelako. Espainia ez da soberanoa, gauza askotan Europak agintzen du. Orduan, soberania konpartituetara goaz. Nik uste hobe dela gauzak ikustea errealitatean nola diren, ilusio batekin bizitzea baino. (…)

 

Guretzat bentaja bat da anbiguoak izatea, hor mugitzen gara ondo. Hori galtzea… Erabakirik hartu gabe eta nahasduran hobeto joaten zaigu erabakiak hartuta eta argitasunean baino”.

Naroa Iturrik gidatutako programan Karmelo Landa ezker abertzaleko kidea eta Iñaki Zarraoa EAJko kidea eta Getxoko alkate ohia  ere ageri dira, elkarrekin berriketan. “Gure Esku Dagok abantaila bat izango du –dio Zarraoak–: gehiago ezagutuko dugu elkar. Hemen bizikidetza konpondu behar dugula esaten dugu, bada ekimen honek ere egingo du bere lana horretan”.

Iñaki Zarraoa Algortan ari da Gure Esku Dago promozionatzen. Karmelo Landak, berriz, Bilboko Zazpi kaleetan eman du izena ekimenean parte hartzeko: “Bilbon era askotako jendea dago, kolore, ideologia, hizkuntza eta sinesmen askotakoa. Adostu behar dugu guztiontzako etxe bat, Euskal Herria izatea guztiontzako etxea”.

Ekimenaz gehiago jakin nahi baduzu sartu Argiako Gure Esku Dago kanalera. Giza katearen mapa ere eskuragarri duzu hemen.