Felix Padin, anarkista azken unera arte

Atalak: Historia, Politika

Felix Padin Gallo anarkista bilbotarra asteartean hil zen 98 urte zituela. 1936ko Gerran eta ondoren hamaika sufrimendu pasatakoa zen Padin, sei urtez langile batailoietan ibili zen esklabo. Abuztuan lehen aldiz azaldu ahal izan zuen hori guztia auzitegi batean, Argentinako Maria Servini epaileak frankismoaren krimenen kontra daraman auzian.

“Bidankozetik Igarira zihoan errepidea egin genuen diziplinazko langile batailoi batean, 1940tik 1942ra.600 preso-edo. Dena eskuz: harria harrobitik zati handietan ekarri, marraturiko errepidera eskorgaz garraiatu, eta, tiki-taka, pixkana harria borraz txikitu eta zabaltzen genuen. Gero eta harri gehiago jartzen ziguten gainera, txikitzeko! Ondoren Gipuzkoara: Gaintxurizketa, Lezo, Errenteria, Oiartzun, Zarautz… Bizitza osoan hala izango gintuztela uste genuen!”

Halaxe kontatu zion anarkistak Aitor Azurki kazetariari, astekari honentzat egindako erreportaje batean. Padinek Espainiako Bigarren Errepublika garaian ekin zion militantzia aktiboari, faxistak gerra prestatzen ari zirela jakitun. Ondoren, gerrako urteetan batailoi anarkistetan jardun zen Bilbo defendatzen, 1937an Basaurin preso hartu zuten arte.

Langile batailoietan gosea eta gaitzak jasan zituen, eta lagunak nola hiltzen ziren ere ikusi zuen (eskuineko irudian Gaintxurizketan). Hala ere, Padinek bere ideiak defendatzen segi zuen ahal zuen moduan. Frankismoaren ostean CNT sindikatua berpizten lagundu zuen Miranda de Ebron, eta diktadurako krimenengatik justizia eskatzeko egindako ekintzetan parte hartu zuen azken unera arte, baita Garoñako zentral nuklearra ixteko manifestazioetan ere: “Badaezpada adiskideak ondoan izaten ditut beti, erortzen banaiz eusteko. Egon beharra dago!”, esan zion Azurkiri.

————————-

Miranda de Ebroko Info Miranda guneak Felix Padinen omenez sareratutako bideoa:

Homenaje a Felix Padín from infomiranda on Vimeo.