Zubietara “erreusa besterik ez” da iritsiko?

Atalak: Azpiegiturak, Gizartea, Osasuna

Zabalgarbi erraustegia

Gipuzkoako hondakinen kudeaketaren inguruan hainbat albiste izan da aste honetan: Errauste plantaren kontra aurkeztutako 2.075 helegiteak, bosgarren edukiontzia zabaltzeko Hondakinen Partzuergoaren asmoak, Usurbilgo erreferendumaren data… Gaur Zubietako erraustegiaren inguruko hainbat xehetasun eman ditu Hondakinen Partzuergoko kudeatzaile Ainhoa Gonzalezek Berria egunkariko erreportaje batean.

Partzuergoko ordezkariak azaldu duenez kokapenaren inguruan izan dituzte zailtasun gehien: “Nahi duguna da begientzako inpaktua ahalik eta txikiena izatea”. Horretarako erraustegia eta bertako tximinia estaltzeko neurri ugari hartu dituzte. Harrigarria da erraustegia ezkutatzeko horrelako lanak hartzea, herritar eta kolektiboek haren kontra egiteko arrazoi nagusiena osasunari loturik dagoenean, eta inolaz ere estetika kontuekin. Dena den, isuriak murrizteko neurrien berri ere ematen du Gonzalezek, “punta-puntako” teknologia eta “sistema katalitiko bat” erabiliko dutela esanez, besteak beste.

Errauste plantara “erreusa besterik ez” dela iritsiko dio Gonzalezek. Arraroa da datu hori, Diputazioak zaborraren %43 erreko dela aurreikusten baitu, eta jakina da “erreusa” (birziklatu ezin dena) deitzen zaiona gure hondakinen %20 baino txikiagoa izaten dela. Horrek esan nahi du erreko den zaborraren zati handiena birziklagarria dela, eta ondorioz, Partzuergoa onartzen ari da kontenedoreen sistemak –organikoarentzako bosgarren kontenedorea barne– ez duela hondakin birziklagarriaren zati txiki bat birziklatzeko baino balioko, Europako araudian birziklatzea lehenesten den arren.