Viva la Pepa!
Viva la Pepa 1927
Zaldibian, Arkakatik Enirioko txaboletarako bidean altxor bat gordetzen da. Mendi mazelan dagoen borda zaharkitu eta eder bateko egurrezko atean ez da Amabirjinaren irudirik edo gurutzerik ageri, bisitariak harrituta irakurriko du hau: Viva la Pepa 1927. Nola da posible? Pintada apokrifoa izan litekeela pentsa daiteke, baina zeinek daki, 83 urtez iraun duen altxor bat ere bai. Nork idatzi ote zuen holako deiadar subertsibo espainiarra? Goierri profundoan gaude, Zaldibia karlisten sehaska izan zen urte luzetan, baita 1936an ere… Agian CAF “fabrika handiko” langile aurrerakoiak izan ziren, edo artzain liberal errepublikanoren bat, edo handik pasatu zen hiriko eskursionista utopikoren bat.
Zaldibiako pintada hori denen bistan dago eta badirudi ezaguna dela mendizaleen artean; blog batzuetan ere aipatua izan da jadanik (hemen eta hemen), eta argazkiak zintzilikatu dituzte sarean. Pintada originala balitz, miraria izango litzateke. Miraria, non egina den ikusita, miraria, zein zaharra den frogatuta, eta oraindik mirariago, 40 urteko frankismoari isil-isilik iraun ziola jakinda. Ez da ahaztu behar leku horretatik ez oso urrun, 36an frankismo horrek krudelki fusilatutako bi lagunen gorpuak atera zituztela duela urte gutxi.
La Pepa deitu zitzaion 1812an Cadizen liberalek sortu zuten Konstituzioari. Berez, historialarien artean eztabaida dago ea garai hartakoa ote zen “Viva la Pepa!” esaldi famatua edo geroago sortu zen; honela dio Espainiako kopla zahar batek: Por gritar Viva la Pepa! / me metieron en la cárcel / y después que me sacaron / Viva la Pepay su madre!. Kontua da, pixkanaka, hasieran zuen karga liberal eta subertsiboa galdu eta nolabaiteko anarkia eta kaosa deskribatzeko erabiltzen hasi zirela deiadar hori. Egunkari bat ixten dela frogak bilatu aurretik… “Viva la Pepa!”, Auzitegi batek inolako frogarik gabe auziperatzen duela… “Viva la Pepa!”, torturak salatzen dituztenak salatuak izaten direla… “Viva la Pepa!”. Zer da orduan Espainiako justizia? Viva-la-Pepa bat.
Iruzkinik ez
Trackbacks/Pingbacks