Sasieta Mankomunitateak atez atekoa aztertuko du

Atalak: Gizartea, Osasuna

Bosgarren edukiontzia ezartzen ari da Sasieta mankomuniatea

Gipuzkoako Goierriko herriak biltzen dituen Sasieta Mankomunitateak atez atekoa eskualde horretan ezartzeko bideragarritasuna aztertuko du. Akordio hori sinatu zuen joan den ekainean mankomunitateko batzorde exekutiboak, nahiz eta oraindik ez den ofizialki aurkeztu, Sasietako batzar orokorretik pasa behar baita lehenik. Akordioa baina, Interneten kontsultatu liteke (pdf) eta bertan esaten da “gaikako bilketa egiteko beste modalitate batzuk” aztertuko dituztela, “bereziki atez ate bezala ezagutzen den sistema”.

Horretarako, mankomunitateak datuak bilduko ditu, logistikoak, antolakuntzakoak, ekonomikoak… bai Gipuzkoan eta baita atez atekoa ezarri den beste lekuetan ere (Italia, Katalunia…). Akordioak zehazten duenez, harremanetan jarriko dira Associació de Municips Catalans per al recollida selectiva porta a porta elkartearekin. Horrez gain, bilketa arlo horretan “ospea” duten erakunde independenteen edo adituen kanpoko asistentzia teknikoa kontratatuko dute.

Azterketak bukatuta beharko du egungo hondakin bilketa kontzesioaren epe muga baino urtebete lehenago, eta bitartean, “bosgarren edukiontzia” bezala ezagutzen dena zabalduko dute eskualdean. Hain zuzen, Goierriko hainbat herrietan ezarri ondoren, Beasainen, Ataunen eta Seguran hasi dira bosgarren edukiontzia erabiltzen. Goierriko Hitzari Joan Martin Aldaregiak azaldu dionez, Sasietako mankomunitateak “bosgarren edukiontziaren alde” egingo du eta hori ez beste sistema bat aukeratzen duten udalek “jakin behar dute eurek egin beharko dietela aurre gastuei”. Aldaregiak sistema “mixto” baten aukera ere aipatzen du egunkari horri egindako deklarazioetan.

Joan den apirilean Goierriko zazpi alkatek eta 55 zinegotzik eskatu zuten eskualdean atez ateko sistema ezartzeko azterketa egitea (ezker abertzalea, EB-Berdeak, Aralar eta independenteak) bosgarren kontenedorearen sistema abiatu aurretik. Agiria (pdf) sinatu zutenen artean ziren Sasieta mankomunitateko bost ordezkari.