Hamar gomendio zinematografiko, Sail Ofizialetik harago

2013-09-17  //  Zinemaldia 2013  //  Iruzkinik ez

Sail Ofizialetik harago bada bizitzarik Donostiako Zinemaldian (Sail Ofizialerako aholkuak nahi izanez gero, ikusi Gorka Bereziartua lankidearenak). Hona zine aretoan sartzeko hamar gomendio, Zabaltegi, Zinemira eta Zuzendari Berriak sailak arakatu ostean. (gehiago…)

Bizikletaren mesedetan? Bai zera!

2013-09-02  //  Mugikortasuna  //  3 iruzkin

Irun 30 kilometro/orduko seinalez bete dute uda honetan. Istripuak gutxitzeko eta hiri barneko ekosistema hobetzeko erabaki aproposa izan daiteke (beste kontu bat da beteko al den, seinaleez aparte ez baita bestelako neurririk hartu, badenak jartzea adibidez), baina Udalak ez diezagula harro saldu txirrindulariengan pentsatuz egin duenik.

Autoen abiadura mugatzeak ez du sakoneko arazoa konpontzen.

(gehiago…)

Euskal zinemaren Zinemaldia?

2013-08-23  //  Zinemaldia 2013  //  4 iruzkin

Aurtengo Zinemira saila aurkeztu du Donostiako Zinemaldiak, euskal ekoizpenak biltzen dituen saila, alegia. Azken urteotan, bertako pelikulen presentzia areagotzeko ahalegina egin du jaialdiak, baina espainiar kutsua dario oraindik.

‘Amaren eskuak’ filmaren fotograma. Zinemaldian estreinatuko dute.

(gehiago…)

Medikuen adimen emozional (ez)a

2013-07-02  //  Osasuna  //  Iruzkinik ez

Pentsatu nahi nuke nire familia-medikuaren tankerakoak direla mediku gehienak, errespetuz eta pazientziaz artatzen dutela herritarra, beti aholkuak emateko eta beldurrak uxatzeko prest. Ez nituzke nahiko lehengoan egokitu zitzaidan medikuaren tankerakoak.

Medikuak ez al daki buruaren –eta gorputzaren– osasunari on egiten diola kontsultatik lasai eta informatuta ateratzeak?

(gehiago…)

Pilotak hilko al du Buruz Burukoa?

2013-06-24  //  Kirola  //  Iruzkinik ez

Aimar Olaizolak 22-7 irabazi du finala, Juan Martinez de Irujoren aurka.

Benetako bala bilakatu dira enpresa batek nahiz besteak aukeran jartzen dituzten pilotak. Betiko eztabaida da, eta azken Buruz Burukoan polemika-iturri nagusia: biziegiak al dira pilotak? Muga jarri behar al zaie? Areago, batzuek iradoki duten moduan, zaleak galtzen ari al da txapelketa, ikuskizunerako txarrak diren hain pilota bizien erruz?

Aimar Olaizolaren anai eta botilero Asierrek garbi esan du: urtez urte gero eta jende gutxiago doa Buruz Burukoa ikustera eta pilotek dute errua, oro har “esajeratuak” direlako, “kokatzeko eta erantzuteko aukerarik ere ez dute ematen”. Bi partidu kenduta, txapelketan “ez da egon publikoari gustatu zaion partidurik. Oso partidu azkarrak dira, bi-hiru pilotakadatan erabakitzen direnak, eta hori publikoak ez du atsegin”.

Finalerdietan Irujo-Bengoetxea partidaz gozatzera Atano frontoira gerturatu ginenok frogatu genuen: pilotakada geldiezinen erasoa sufritu zuen leitzarrak (22-13 galdu zuen), eta bere hitzetan, inoiz ez da hain pilota biziekin aritu. Ordutik, Irujok salatu du bere piloten aurkako kanpaina jasan duela, biziegiak direla-eta (azken finean, pilotariak saskian duenaren artean baino ez du aukeratzen eta saskira iristen dena enpresen esku dago); eta beharbada horrek (eta Olaizolak finala atzeratu izanaren ondorioz Iberokoak zuen abantaila fisikoa galtzeak) psikologikoki eragin dio txapeldunordeari.

Irujok berak gaineratu du Buruz Burukoa kaltetzen ari dena ez dela materiala, txapelketaz gaizki hitz egitea baizik. Azken finean, jokoaren baitan dago norberari komeni zaion materiala hautatu ahal izatea, kirol honen gatza eta piperra ere bada neurri batean. Baina aldi berean, egia da material biziegiak buruz buruko partidetan ikuslea, ikuskizuna eta kirola bera kaltetu ditzakeela. Izan ere, mugarik gabe, eta norabide honetan jarraituz gero, non geldituko da lehia? Non espektakulua eta benetako norgehiagoka? Argigarriak dira Jesus Garcia Ariño pilotari ohiaren hitzok: “Pilotaria da pilota mendean hartu behar duena, eta ez alderantziz. Urteak daramatzagu pilotak bajatu behar direla esanez, eta martxa honetan azkenean errebotea ere kendu egin beharko dugu frontoietatik; pilota hau ez da eskuz jokatzeko, palaz jokatzeko da”.

Bizi Tokiren jardunaldi pedagogikoak: Nola transmititu baloreak haurrei, haientzat zentzua izan dezaten?

2013-06-18  //  Hezkuntza  //  Iruzkinik ez

Duela bi urte abiatu zen Bizi Toki, Behauze herriko Goitia baserrian.

Hezkuntza eredu tradizionaletik at, “balore eder batzuen arabera gurasoek eta beren lagunek hezitako haurrak” ditu helburu Bizi Toki egitasmoak. Ikusi eta ikasi jardunaldi pedagogikoak antolatu ditu hilaren 22 eta 23an, haurrei baloreak transmititzeaz, marrazketaren garrantziaz eta emozioak adierazteaz hausnartzeko. (gehiago…)

Eskua ez ematea da desobedientziaren lehen urratsa

2013-06-05  //  Hezkuntza  //  Iruzkinik ez

Eskua ez ematea, kasu honetan, ez delako edukazio txarraren seinale (eskuin muturrak adierazi duen moduan), baizik eta hezkuntzaren kontra egiten ari diren politika suntsitzailea ez ohoratzeko modua. Kalifikazio onenak atera dituzten ikasleek ukatu diote agurra Espainiako Wert ministroari –hauek ere perroflauta ote Gobernuarentzat?– eta horrek deseroso utzi du LOMCE legearen bultzatzailea. (gehiago…)

Mehatxu sotila

2013-05-28  //  Ekonomia, Gizartea  //  Iruzkinik ez

Andonik esan dit oraingoan ez duela greba egingo, ezin duela. Nagusiak debekatu al dion galdetu diot. “Ez, baina ostiralerako pieza guztiek bukatuta egon behar dutela agindu dit, eta horretarako ostegunean lan egin beharko dut nahitaez”. Sotilki egindako mehatxua ere mehatxu da.

Krisia hasi zenetik, ostegunekoa seigarren greba orokorra izango da Euskal Herrian.

(gehiago…)

Nuclenor-ek adarra jo digu berriz

2013-05-24  //  Energia  //  Iruzkinik ez

Antzerki hutsa zela ohartarazi zuten eszeptikoenek, Espainiako Gobernuari (eta honek sektore energetikoan ezarri nahi zuen zerga-sistema berriari) presioa egiteko iragarri zuela Nuclenor enpresak Garoña zentral nuklearraren itxiera. Hain zuzen, betiko ixteko data baino hilabete eta erdi lehenago, martxan jarraitu nahi dutela adierazi dute zentralaren arduradunek. Eta utzi egingo diete gainera.

Segurtasun Nuklearraren Kontseilua eta Espainiako Gobernua lagun izan ditu pantomima honek. Irudian, Garoñako zentral nuklearra (Dani Blanco).

(gehiago…)

Noiz uzten dio kirolak dibertsio izateari?

2013-05-15  //  Hezkuntza, Kirola  //  Iruzkinik ez

Alejandro Rodriguez, 5 urteko kanariarra, entrenatzailearen eta arbitroaren artean.

Bada, helduak tartean sartzen direnean. Hori islatzen du asteburuan minibenjamin-aurreko kategoriako partidu batean atera zuten argazki honek. Irabazteko lehiatzen, elkarrekin beharrean elkarren kontra jokatzen, aurkaria zapaltzen eta jokoaren arauak ez errespetatzen helduongandik ikasten dute haurrek, eta goizegi.

Ikuskizun tamalgarriak izaten dira umeen zenbait partidu –bereziki futbolean, hori ere esan behar da–, gurasoak garrasika –irainka– hasten zaizkionean arbitroari, aurkariei, entrenatzaileari eta, huts eginez gero, baita seme-alabaren taldekideei ere. Eredu lehiakor horren barruan, hobea izateko presio eta gorroto-iturri bilakatzen da kirola txiki-txikitatik, gaiztotutako giro batean.

Hori guztia ezin hobeto atzeman du Rubén López Estupiñán-en argazki-kamerak. Kanariar Uharteetan, haurren arteko norgehiagoka batean entrenatzailea eta arbitroa eztabaida sutsuan ari zirelarik, Alejandro Rodríguez txikiak bien artean jarri behar izan zuen, “aski da, aski da, aski da” oihukatuz. Dirudienez, ordurako giroa bero zegoen kiroldegiko harmailetan, zer eta 5 urteko umeen partidu batean. Haurraren erreakzio naturalak gelditu zuen –ohiko bihurtu den– burugabekeria.

Bai, ezagutzen dugu goi-mailako kirolaren alde iluna, atzean dagoen diru-festa, emaitzen menpe bizi diren kirolariak eta dopinaren itzala. Baina gutxienez haurrak diren bitartean, balore positiboetan hezteko eremu ludikoa izan beharko luke kirolak, zer arraio!